Stjórnvöld hafi „háþrýstiþvegið“ sannleikann burt

Þingmenn Pírata lýstu yfir furðu og óánægju með það á Alþingi nú síðdegis að áletrunin „Hvar er stjórnarskráin?“ skyldi hafa verið fjarlægð af vegg við Sjávarútvegshúsið við Skúlagötu í gær.

Jón Þór Ólafsson þingmaður Pírata sakaði stjórnvöld um að „háþrýstiþvo“ sannleikann í burtu með athæfinu.

„Það er táknrænt að þegar stjórnvöld komast ekki lengur upp með það að sópa nýju stjórnarskránni undir teppið, þá beinlínis háþrýstiþvo þau í burtu sannleikann um vanvirðingu þeirra við þjóðarviljann,“ sagði Jón Þór.

„Veggur sem staðið hefur óáreittur árum saman þakinn veggjakroti er skyndilega forgangsverkefni í stjórnarráðinu. Það hefur ekki hvarflað að stjórnvöldum í eina sekúndu að hreinsa vegginn. Það þurfti ekki nema eina saklausa spurningu. Hvar er nýja stjórnarskráin? Hvar er hún?“

Fór veggjakrotið fram hjá hinum „góðu spúlurum?“

Björn Leví Gunnarsson þingmaður Pírata sýndi viðstöddum mynd af umræddum vegg og svæðinu í kringum hann, sem tekin var fyrr í dag. Á myndinni sést að enn er mikið veggjakrot á aðliggjandi veggjum.

„Veggjakrotið var ekki þrifið, bara spurningin um hvar nýja stjórnarskráin væri,“ sagði Björn.

„Þar er fullt af veggjakroti bara rétt við hliðina á, sem einhvern veginn fór algjörlega fram hjá þessum góðu spúlurum. Og þá veltir maður fyrir sér hvort að þetta hafi verið fyrsta veggjakrotið sem þeir tóku eftir.“

Björn sagði jafnframt ríkisstjórnina sjálfa vera vegg sem standi í vegi fyrir nýrri stjórnarskrá samkvæmt niðurstöðu þjóðaratkvæðagreiðslu. „Af hverju er ekki búið að spúla þeim vegg í burtu?“ spurði Björn. Myndina af veggjakroti við umræddan vegg, sem hann sýndi viðstöddum á þingi, má sjá í Facebook-færslu hans hér fyrir neðan.

Leggja áherslu á áberandi krot

Viktor Jens Vigfússon, framkvæmdastjóri Umbru, rekstrarfélags stjórnarráðsins, sagði í samtali við Vísi í dag að umrædd áletrun hefði verið fjarlægð af veggnum eftir ábendingu frá atvinnu- og nýsköpunarráðinu, sem er til húsa í Sjávarútvegshúsinu. Umbra hafi ekki tekið við umsjón hússins og lóðarinnar fyrr en síðla sumars og þetta hafi verið fyrsta „veggjakrotið“ sem birst hafði eftir að félagið tók við rekstrinum.

Viktor segir í svari við fyrirspurn Vísis nú á fjórða tímanum að ekki standi til að þrífa veggjakrot í nágrenni veggjarins umdeilda. Það sé í forgangi að þrífa veggjakrot á byggingum ráðuneytanna og það sem sé áberandi í umhverfi þeirra, t.a.m. það sem snýr að götum. Reynt sé að bregðast við öllum ábendingum og óskum en þrifin geti verið kostnaðarsöm. 

„Það er minni áhersla á það sem er lítið áberandi, eins og t.a.m. það sem snýr inn að bílastæðum. Hluti af þessum lóðum/bílastæðum tilheyra auk þess ekki ráðuneytunum og eru þar með ekki í umsjón Umbru,“ segir Viktor.

Áletrunin var máluð á veggin um helgina og fékk aðeins að standa í tvo sólarhringa áður en hafist var handa við að þvo hana burt.

Katrín Oddsdóttir formaður Stjórnarskrárfélagsins sagði í samtali við Vísi í gær að það skyti skökku við að áletrunin hafi verið fjarlægt svo fljótt í ljósi þess að engin afskipti hafi verið höfð af veggjakrotinu hingað til. Hún kvaðst líta á verknaðinn sem þöggun.