Þrjú íslensk skip kærð fyrir ólöglegar veiðar

Í liðinni viku voru þrjú íslensk fiskiskip staðin að meintum ólöglegum veiðum innan lokaðra svæða í íslensku efnahagslögsögunni. Svo segir í tilkynningu frá Landhelgisgæslunni.

Á þriðjudagskvöld hafi varðstjórar í stjórnstöð Landhelgisgæslunnar orðið varir við að fiskiskip væri á togferð innan lokaðs hólfs þar sem ekki er heimilt að veiða með fiskibotnvörpu.

Skipstjórinn sagðist ekki hafa vitað af lokuninni og var varðskipið Týr sent á staðinn. Eftirlitsmenn varðskipsins fóru um borð þegar skipið kom til hafnar og framkvæmdu rannsókn.

Varðstjórar í stjórnstöð urðu einnig áskynja um meintar ólöglegar veiðar tveggja fiskiskipa til viðbótar. Landhelgisgæslan hafði samband við bæði skipin sem voru einnig innan lokaðra svæða. 

Öll málin verða kærð til lögreglu.