Nemandi í Varm­ár­skóla greindist með veiruna

Nemandi í Varmárskóla í Mosfellsbæ hefur greinst kórónuveiruna. Þetta kemur fram í pósti sem sendur var á foreldra og forráðamenn barna í skólanum.

Samkvæmt tölvupóstinum hefur verið haft samband við alla hlutaðeigandi í samræmi við tilmæli smitrakningateymis almannavarna. Smitið mun ekki koma til með að hafa áhrif á starfsemi skólans.

Foreldrar eru hvattir til þess að kynna sér einkenni kórónuveirusmits og halda nemendum heima verði þeir varir við einkenni. Þá er brýnt fyrir öllum að kynna sér þær reglur sem eru í gildi hverju sinni og leiðbeiningar landlæknis varðandi kórónuveirusmit.