Willum skoraði tvö mörk og Viktor Gísli lokaði markinu hjá GOG

Willum Þór Willumsson átti frábæran leik fyrir Bate Borisov er hann skoraði tvö mörk í 5-2 sigri liðsins á Smolovichy í dag í Hvíta-Rússlandi.

Willum skoraði fyrsta markið á ellefu mínútu og skoraði svo þriðja mark Bate á 61. mínútu er hann kom þeim í 3-1.

Bate er í 2. sætinu í Hvíta Rússlandi með jafn mörg stig og topplið Shakhtyor Soligorsk.

Í danska handboltanum átti Viktor Gísli Hallgrímsson afar góðan leik fyrir GOG sem vann átta marka sigur á Århus, 29-21.

Leikurinn var liður í fyrstu umferð danska handboltans en Viktor Gísli varði ellefu skot eða um 36% markvarsla.

Sterk byrjun hjá GOG sem er með einn Íslending á sínum snærum þetta tímabilið en var með þrjá á síðustu leiktíð.

Sandra Erlingsdóttir skoraði þrjú mörk fyrir EH Álaborg er liðið vann fjögurra marka sigur á SönderjyskE í fyrstu umferðinni kvennamegin í Danmörku.

Sandra gekk í raðir Álaborgarliðsins í sumar frá ÍBV en hún hafði skipt einnig um mitt sumar frá Val yfir til ÍBV.