Mömmurnar í fararbroddi á Opna bandaríska risamótinu

Serena Williams, Victoria Azarenka og Tsvetana Pironkov eiga allar annað sameiginlegt en að vera komnar alla leið í átta manna úrslit á Opna bandaríska meistaramótinu i tennis.

Þetta er í fyrsta sinn í nútímasögunni þar sem þrjár mömmur eru komnar svo langt á einu virtasta tennismóti heims.

Serena Williams og Victoria Azarenka tóku báðar börnin sín með til New York en Tsvetana Pironkov var hörð og skildi soninn sinn eftir heima.

Serena Williams og Victoria Azarenka hafa báðar verið á efsta palli á heimslistanum og ólétta þeirra á síðustu árum átti mikinn þátt í því að pressa meira á það að auðvelda tenniskonum að eignast börn en halda svo ferlinum áfram.

Það var stigið stórt skref í byrjun síðasta árs þegar WTA tennismótaröðin uppfærði reglur sínar um að staða tenniskvenna á heimslistanum helst óbreytt í þrjá ár á meðan þær eru í barneignarfríi.

Það er ljóst að gengi þessara þriggja á þessu móti að mömmurnar eru að koma sterkar inn eftir að hafa varla sést á stóra sviði tennissins þar á undan.

Victoria Azarenka mætir hinni belgísku Elise Mertens í átta manna úrslitunum en svo verður mömmu-slagur þegar Serena Williams keppir við hina 32 ára búlgörsku tenniskonu Tsvetönu Pironkova.

Pironkova eignaðist soninn sinn í apríl 2018 og þetta er fyrsta mótið hennar síðan hún byrjaði að keppa á nýjan leik. Hún er þegar búin að vinna fjóra leiki á mótinu og ein þeirra á móti gamla Wimbledon meistaranum Garbine Muguruza.

Strákurinn hennar er heima hjá föðurnum í Búlgaríu en það er fyrrum knattspyrnumaðurinn Mihail Mirchev.

Serena Williams er aftur á móti með dótturina Olympia með sér í New York og sömu sögu er að segja af Victoriu Azarenka og syni hennar Leo. Victoria Azarenka háði forræðisdeilu við barnsföður sinn sem er íshokkíleikmaðurinn Billy McKeague en þau hafa nú leyst málið.

Hin 38 ára gamla Serena Williams hefur þegar unnið 24 risatitla á ferlinum en er enn að bíða eftir þeim fyrsta eftir að hún varð móðir. Olympia kom í heiminn í september 2017 en Williams fagnaði síðast sigri á risamóti á opna ástralska mótinu árið 2017.

Allar þessar þrjár eiga möguleika á því að vera aðeins fjórða konan til að vinna ristitil í nútímanum eða frá árinu 1968. Hinar eru Kim Clijsters, Evonne Goolagong og Margaret Court.

Jennifer Brady og Naomi Osaka hafa þegar unnið sinn leik í átta manna úrslitum og eru því þegar komnar í undanúrslitin.