Ráð­herra heim­sækir Suður­nesin vegna á­standsins

Félagsmálaráðherra mun heimsækja Suðurnes öðru hvoru megin við helgina til að fara yfir stöðuna í þeim landshluta vegna mikils atvinnuleysis. 17 prósent eru án atvinnu á Suðurnesjum og nær fimmti hver atvinnulaus í Reykjanesbæ. 

Hefur kórónuveirufaraldurinn bitnað hvað harðast á þessum landshluta. Margir íbúa starfa á Keflavíkurflugvelli þar sem fjölda hefur verið sagt upp síðustu daga.

„Ég er að undirbúa að heimsækja Reykjanesbæ öðru hvoru megina við helgina. Ég ætla að funda með forsvarsmönnum sveitarfélaga og Vinnumálastofnunar á svæðinu og stærri atvinnurekendum. Með í för verða starfsmenn ráðuneytisins og Vinnumálastofnunar,“ segir Ásmundur Einar Daðason félagsmálaráðherra.

Verður farið í þessa heimsókn til að meta þörfina á frekari vinnumarkaðsaðgerðum á svæðinu.

„Og þar er fyrsta skrefið að hitta heimamenn og ræða við þá um stöðuna.“