Tugir féllu í loftárás Sáda í Jemen

Talið er að rúmlega þrjátíu manns, þar á meðal óbreyttir borgarar, hafi fallið í loftárás hernaðarbandalags Sáda í gær. Talsmaður bandalagshersins neitar því ekki að óbreyttir borgarar gætu hafa fallið í árásunum sem eru taldar hefndaraðgerð vegna herþotu Sáda sem uppreisnarmenn Húta sögðust hafa skotið niður á föstudag.

Skrifstofa Sameinuðu þjóðanna í Jemen sagði bráðabirgðaskýrslur um mannfall benda til þess að allt að 31 óbreyttur borgari hafi fallið og tólf aðrir særst í árásum bandalagshersins í al-Hayjah í al-Jawf-héraði. Heilbrigðisráðuneyti stjórnar Húta á svæðinu segir að konur og börn séu á meðal þeirra föllnu, að því er segir í frétt Reuters-fréttastofunnar.

Hútar lýstu yfir ábyrgð á því að herflugvél bandalagshers Sáda sem styður stjórnarherinn í landinu fórst á svæðinu á föstudag. Sádar hafa aðeins viðurkennt að vélin hafi „hrapað“. Turki al-Malki, ofursti og talsmaður bandalagshersins, segir að leitaraðgerðir væru hafna vegna vélarinnar og útilokaði ekki mannfall óbreyttra borgara. Fullyrti hann að tveir af þeim sem voru um borð í vélinni hafi skotið sér út úr henni en Hútar hafi skotið á þá.

Sádar og bandalag ríkja þar sem súnnímúslimar eru í meirihluta greip inn í borgarastríð í Jemen árið 2015 og hefur stutt stjórnarherinn gegn uppreisnarmönnum Húta sem steyptu þáverandi ríkisstjórn landsins af stóli árið 2014. Stríðið er almennt talið staðgöngustríð á milli Sáda og erkifjenda þeirra Írana sem styðja Húta.