Kölluð út vegna hópslags­mála á skóla­lóð í Kópa­vogi

Þrír lögreglubílar og bíll sérsveitar ríkislögreglustjóra voru send á vettvang eftir að tilkynnt hafði verið um hópslagsmál og hraðakstur inni á lóð Hörðuvallaskóla í Kórahverfi í Kópavogi í gærkvöldi.

Þetta staðfestir Gunnar Hilmarsson, aðalvarðstjóri hjá lögreglunni á höfuðborgarsvæðinu í samtali við Vísi.

Gunnar segir tilkynnt hafi verið um stóran hóp ungmenna á lóð skólans um klukkan 23. „Þetta voru um 150 til tvö hundruð krakkar. Þetta var mjög óljóst en engar tilkynningar eru um að nokkur hafi slasast. En þarna var gríðarlegur fjöldi af krökkum, fyrirgangur og einhverjir á bílum að elta krakka inni á skólalóðinni.“

Gunnar segir að það hafi verið svolítið um hópasafnanir við skólann að undanförnu. „Þetta eru líka krakkar úr öðrum hverfum. En þetta er ekki bundið við Hörðuvallaskóla og þannig hafa líka verið sambærileg útköll í Breiðholtinu og víðar.“