Áramótaheit formannanna: Stundvísari Sigmundur og meira jóga

Formenn Alþingisflokkanna voru mættir í Kryddsíld Stöðvar 2 til þess að gera upp árið í stjórnmálunum og líta fram á veginn, eins og venjan er á gamlárskvöld. Pólitíkin var þó ekki það eina sem komst að, en formennirnir voru beðnir um að fara yfir sín persónulegu markmið og áramótaheit fyrir árið 2020.

Inga Sæland, formaður Flokks fólksins, er með markmið sem margir kannast við að hafa sett sér einhvern tímann á lífsleiðinni. Hún ætlar sér að fara í „fantaform“ á árinu. Hún hafi misst sex kíló núna fyrir áramót og stefnir hún á að þau verði orðin tíu nú í vor.

Þá er Bjarni Benediktsson, fjármálaráðherra og formaður Sjálfstæðisflokksins, að ganga í nýtt hlutverk á árinu. Nefnilega afahlutverkið. Segist hann meðal annars ætla að sinna því hlutverki eftir bestu getu.

„Ef það er eitthvað sem er efst í huga, þá er það að  reyna að sinna fjölskyldunni betur og reyna að hámarka þessar fáu stundir sem maður á með sínum nánustu,“ sagði Bjarni og tók fram að það ætti bæði við um þá fjölskyldumeðlimi sem fyrir eru og þá sem bætast við á komandi ári.

Hann telji það nokkuð gott markmið fyrir stjórnmálamann.

„Oft farast fyrir þessi mikilvægustu mál, og það er stundirnar með þeim sem standa manni næst.“

Sigurður Ingi hefur lært af reynslunni

Sigurður Ingi Jóhannsson, sveitastjórna- og samgöngumálaráðherra og formaður Framsóknarflokksins, segist margoft hafa strengt áramótaheit í gegn um tíðina.

„Ég hef gert það of oft, og nú er ég búinn að læra af reynslunni að hafa þau hófstilltari.“

Það sé þó eitt áramótaheit sem hann ætli að tileinka sér.

„Þó svo að maður nái ekki einhverju markmiði sínu einn, tveir og þrír, þá er það ekki tap. Þá byrjar maður bara næsta dag aftur,“ sagði Sigurður og bætti við að hann teldi að árið 2020 yrði gott ár.

Halldóra Mogensen, Pírötum, stefnir á að finna hið eftirsótta jafnvægi milli vinnu og einkalífs, auk þess sem hún sagðist vilja finna meiri tíma til að verja með dóttur sinni.

„Ég held að það sé alltaf áskorun í þessu starfi, finn ég meira og meira, að vera trú og samkvæm sjálfri mér,“ sagði hún, og bætti við að hún vildi líka stunda meira jóga á árinu.

Þorgerður lætur hjartað ráða för

Þorgerður Katrín Gunnarsdóttir, formaður Viðreisnar, sagðist þá hafa fengið ráðleggingar um framtíðina frá gamalli vinkonu.

„Hún lagði mér þær lífsreglur að láta hjartað ráða alltaf för. Hún sagði: „Þú hefur gret það fram til þessa, en ekki gleyma því.“ Og ég ætla að gera það,“ sagði Þorgerður.

Sigmundur Davíð Gunnlaugsson, formaður Miðflokksins, var með nokkur persónuleg markmið.

„Ég held bara áfram að reyna með það sem ekki hefur tekist til þessa. Vera stundvísari, skipulagðari og auðvitað að léttast aftur,“ sagði Sigmundur og bætti við að hann hefði náð ágætis árangri í líkamsræktinni, en þyngst eilítið aftur þegar hann slakaði á í sumar.

Logi Einarsson, formaður Samfylkingarinnar, sagðist fyrst og fremst ætla að verða „skárri maður“ en hann var á síðasta ári.

„Ég er svo heppinn að búa fjarri fjölskyldu minni og um hverja helgi þá heimsæki ég hana. Það er alltaf gleðilegt og ég ætla að reyna að vera duglegri þegar ég kem þangað að sinna húsverkum og vera góður við þau,“ sagði Logi.

Hann ætli sér þó líka að vera duglegur að hitta sveitarstjórafólk og almenna flokksmenn Samfylkingarinnar á árinu.

Sjá einnig: Fréttaannáll Kryddsíldar 2019

Katrín Jakobsdóttir, forsætisráðherra og formaður Vinstri grænna, var síðan innt eftir sínum heitum, síðust formannanna. Sagðist hún eiga einfalt markmið, sem hljóðaði eins um hver áramót. Að gera eitthvað sem hún hefði aldrei gert áður.

Á árinu 2019 hafi hún til að mynda farið í golf í fyrsta skipti, sjálfri sér og öðrum vallargestum á Akureyrarvelli til mikillar skemmtunar. Hún hafi líka farið í sturtu á flugvelli, og sagðist geta mælt með því við hvern sem er.

„Maður á alltaf að gera eitthvað nýtt, annars er hættan sú að maður verði bara einhver sem maður var í hittifyrra,“ sagði Katrín.

Myndbrot úr Kryddsíldinni þar sem formennirnir fara yfir áramótaheit sín má sjá í spilaranum hér að ofan.