Bræður og eldri borgari svara fyrir umfangsmikil skattsvik

Þrír bræður á sextugsaldri búsettir í Reykjavík og karlmaður á áttræðisaldri á Ísafirði eiga að mæta fyrir Héraðsdóm Reykjavíkur í næstu viku til að svara fyrir ákæru um meiriháttar skattsvik í sex fyrirtækjum.

Um er að ræða brot á bókhaldslögum með því að hafa rangfært bókhald um árabil sem gaf ranga mynd af viðskiptum og notkun fjármuna fyrirtækja þeirra yfir nokkurra ára tímabil. Brotin ná aftur til ársins 2009 en stærstur hluti þeirra átti sér stað frá 2010-2014 samkvæmt því sem kemur fram í ákærunni.

Ákæra héraðssaksóknara er upp á nítján blaðsíður og ákæruliðirnir fjölmargir. Misjafnt er hvort mennirnir eru ákærðir saman fyrir brot eða hver fyrir sig. Allir eru sömuleiðis ákærðir fyrir peningaþvætti. Bræðurnir komust undan því að greiða á annað hundrað milljónir króna samanlagt í skatt.

Fram kemur í ákærunni að á Þorláksmessu árið 2015 hafi samanlagt tæplega 220 milljónir króna á  reikningum nokkurra einkahlutafélaga í eigu bræðranna verið frystar Þess er krafist að fjármunirnir verði gerðir upptækir.

Má reikna með að verði mennirnir fundnir sekir þurfi þeir hver fyrir sig að greiða þrefalda þá upphæð sem þeir greiddu ekki í skatt.