Fimm ára samningur bíður Andra Fannars hjá Bologna

Hinn átján ára gamli Andri Fannar Baldursson mun að öllum líkindum skrifa undir nýjan fimm ára samning við Bologna á næstu vikum.

Andri Fannar gekk í raðir Bologna á láni í janúar fyrir rúmu ári síðan en var svo keyptur til ítalska úrvalsdeildarfélagsins síðasta sumar.

Hann hefur komið inn á í leikjum gegn Inter Milan og Napoli á síðustu dögum og virðist eiga mikla framtíð innan félagsins enda bíður hans nýr samningur.

„Ég er með samning fram til næsta sumars en það eru búnar að vera miklar samningaviðræður í gangi núna. Það lítur út fyrir að ég skrifi undir nýjan samning á næstu dögum,“ sagði Andri Fannar í samtali við Valtý Björn Valtýsson í þættinum Mín Skoðun á Sport FM.

„Þetta er langtímasamningur. Þetta eru fimm ár.“