Andri Fannar kom inn á gegn Napoli

Andri Fannar Baldursson kom inn á sem varamaður á 78. mínútu er Bologna gerði 1-1 jafntefli við Napoli í ítölsku úrvalsdeildinni í knattspyrnu.

Konstantinos Manolas kom Napoli yfir á sjöundu mínútu en tveimur mínútum eftir að Andri Fannar kom inn á jafnaði Musa Barrow metin.

Bologna er í 10. sætinu með 43 stig en Napoli er í sjötta sætinu með 53 stig.

Böðvar Böðvarsson spilaði í klukkutíma er Jagiellonia Bilaystok vann 2-1 sigur á Slask Wroclaw á heimavelli í pólsku úrvalsdeildinni.

Böðvar nældi sér í gult spjald í fyrri hálfleiknum en sigurmarkið kom á 72. mínútu. Jagiellonia er í 7. sætinu með 49 stig.

Sverrir Ingi Ingason sat allan tímann á bekknum hjá PAOK sem gerði markalaust jafntefli við AEK Aþenu á heimavelli.

PAOK er í 2. sætinu með 72 stig en AEK því þriðja með 69 stig.