AC Milan nálgast Evrópusætin eftir sigur á Roma

AC Milan fékk AS Roma í heimsókn í fyrsta leik dagsins í ítölsku úrvalsdeildinni í dag en fyrir leikinn voru liðin í 5. og 8.sæti deildarinnar.

Fyrri hálfleikur var markalaus og fyrsta mark leiksins kom ekki fyrr en á 76.mínútu þegar Ante Rebic kom heimamönnum í forystu.

Í stað þess að Rómverjar næðu að jafna metin á lokakaflanum gulltryggði Hakan Calhanoglu sigur heimamanna með marki úr vítaspyrnu á 87.mínútu.

AC Milan lyfti sér upp í 7.sæti deildarinnar þar sem liðið hefur jafnmörg stig og Napoli sem er í 6.sæti en efstu sex sæti ítölsku úrvalsdeildarinnar veita keppnisrétt í Evrópukeppni á næstu leiktíð.