Dæmdur fyrir að fróa sér á almannafæri

Héraðsdómur Reykjavíkur dæmdi á dögunum karlmann til þriggja mánaða fangelsisvistar fyrir að fróa sér á almannafæri. Dómurinn er skilorðsbundinn til tveggja ára.

Maðurinn var ákærður fyrir að hafa berað kynfæri sín og fróað sér utandyra á gatnamótum Gunnarsbrautar og Kjartansgötu í Reykjavík, þann 8. september 2018. Tveir borgarar, sem ekki eru nefndir á nafn í dómi héraðsdóms, urðu vitni að athæfi mannsins, sem og fjórir lögregluþjónar.

Maðurinn var upphaflega ákærður fyrir blygðunarsemisbrot gegn öllum sem urðu vitni að atvikinu, en síðar var fallið frá saksókn fyrir að særa blygðunarsemi tveggja lögreglumannanna. Maðurinn neitaði sök og krafðist sýknu í málinu.

Í dómi héraðsdóms kemur fram að þrátt fyrir að neita sök kannaðist maðurinn við að hafa verið á umræddum gatnamótum á umræddum tíma. Kvaðst hann hafa verið ölvaður, í „black out-ástandi“ og sagðist hafa verið að kasta af sér vatni. Við skýrslutöku vegna málsins, sama dag og atvikið átti sér stað, kvaðst maðurinn þó ekki muna eftir athæfinu.

Hjón nokkur sem báru vitni í málinu sögðu bæði af og frá að maðurinn hefði verið að kasta af sér vatni. Eins sögðu þau að enginn vafi hafi verið um að maðurinn hefði verið að fróa sér. Þetta rímar við vitnisburð tveggja lögreglumanna sem komu á vettvang, en annar þeirra sagði meðal annars að limur mannsins hafi verið reistur og hann hafi skakað sér utan í nálæga bifreið. Hinn sagðist hafa séð til mannsins með buxurnar á hælunum, en sá hann þó ekki fróa sér, þar sem hann hafði ekki samskipti við ákærða, heldur önnur vitni.

Í dómi yfir manninum kemur fram að fyrri sakaferill hans, sem ekki er nánar rakinn, hafi ekki þýðingu við úrlausn málsins. Því sé hæfileg refsins þriggja mánaða skilorðsbundið fangelsi. Eins var maðurinn dæmdur til að greiða málsvarnarlaun verjanda síns og þóknun fyrri verjanda.