Willum bikarmeistari í Hvíta-Rússlandi eftir dramatík

Willum Þór Willumsson og félagar í BATE Borisov eru bikarmeistarar í Hvíta-Rússlandi eftir 1-0 sigur á Dynamo Brest í framlengdum leik.

Staðan var markalaus eftir venjulegan leiktíma en Willum Þór byrjaði á bekknum. Hann kom inn á eftir hundrað mínútur en sigurmarkið kom í uppbótartíma er allt stefndi í vítaspyrnukeppni.

Zakhar Volkov skoraði sigurmarkið beint úr aukaspyrnu en þetta er í fjórða skiptið sem BATE verður bikarmeistari í Hvíta-Rússlandi. Þeir unnu síðast bikarinn tímabilið 2014/2015.