Prófessorar segja tilefni til að ákæra Trump

Þrír fræðimenn um stjórnarskrá Bandaríkjanna segja tilefni til að ákæra Donald Trump, forseta, fyrir embættisbrot. Sá fjórði dregur í efa að tilefni sé til staðar. Þetta sögðu fræðimennirnir á opnum fundi dómsmálanefndar fulltrúadeildar Bandaríkjaþings, sem hefur tekið við rannsókninni á mögulegum embættisbrotum Trump.

Áðurnefndir þrír fræðimenn voru boðaðir á fundinn af Demókrötum í nefndinni og sá fjórði af Repúblikönum. Fundurinn var boðaður í kjölfar þess að leyniþjónustunefnd þingsins gaf í gær út skýrslu þar sem því er haldið fram að Trump hafi „fórnað þjóðarhagsmunum Bandaríkjanna í eigin pólitísku þágu“.

Trump er gert að hafa beitt utanríkisstefnu Bandaríkjanna gagnvart Úkraínu með því markmiði að þvinga Volodymyr Zelensky, forseta Úkraínu til að tilkynna upphaf tveggja rannsókna sem myndu nýtast Trump í kosningunum á næsta ári.

„Ef það sem við erum að tala um er ekki embættisbrot, þá er ekkert embættisbrot,“ sagði prófessorinn Michael Gerhardt.

Sjá einnig: Segja Trump hafa brotið af sér í starfi



Jerrold Nadler, formaður nefndarinnar, sagði í upphafi fundarins að staðreyndir málsins væru óumdeilanlegar. Trump hefði reynt að nota utanríkisstefnu Bandaríkjanna til að fá erlent ríki til að hafa áhrif á forsetakosningarnar á næsta ári og hann gæti reynt að gera það aftur.

„Við getum ekki beðið eftir kosningum til að tækla þessa krísu,“ sagði Nadler. Hann sagði forsetann hafa sýnt það með hegðun sinni að nauðsynlegt væri að bregðast við.

Æðsti þingmaður Repúblikanaflokksins í nefndinni, Doug Collins, sakaði Demókrata um að reyna að fella úr gildi niðurstöðu forsetakosninganna 2016. Demókrötum væri einfaldlega illa við Trump. Þar að auki væri ferlið ósanngjarnt gagnvart Trump. Rannsóknin væri hneisa og skammarleg.



Vert er að benda á að ef fulltrúadeildin ákærir Trump fyrir embættisbrot, er það öldungadeildarinnar, þar sem Repbúlikanar eru í meirihluta, að ákveða hvort víkja eigi forsetanum úr embætti. Ef það yrði gert, tæki Mike Pence, varaforseti við embætti. Það yrði ekki boðað til nýrra kosninga eða eitthvað slíkt.

Repúblikanar vörðu miklum tíma í að krefjast atkvæðagreiðslna um formleg atriði og gagnrýna rannsóknina sjálfa. 

Fræðimennirnir fjórir vörðu miklum tíma í að setja sig í spor landsfeðra Bandaríkjanna, þeirra sem sömdu stjórnarskrá ríkisins átjándu öldinni. Pamela Karlan, frá Stanford, sagði þá hafa haft sérstaklega miklar áhyggjur af afskiptum annarra ríkja af kosningum í Bandaríkjunum. Miðað við niðurstöður rannsóknar fulltrúadeildarinnar hafi Trump einmitt reynt að fá annað ríki til þess.

Fræðimaðurinn Jonathan Turley, sem Repúblikanar kölluðu fyrir nefndina, sagði mögulega kæru gegn Trump byggða á sandi, þar sem Trump hefði ekki framið hreina glæpi. Árið 2014 skrifaði Turley þó grein sem birt var af Washington Post og fjallar um embættisákærur. Þar segir hann að hvorki forseti, né aðrir embættismenn, þurfi að fremja glæpi til að vera vikið úr embætti.