Sluppu með naumindum við að verða við kröfum Trump

Úkraínumenn sluppu með naumindum við að verða við kröfum Donald Trump, forseta Bandaríkjanna, um að lýsa opinberlega yfir að þeir ætluðu að hefja rannsókn á pólitískum andstæðingi Trump. Helstu aðstoðarmenn Volodymyr Zelensky, forseta Úkraínu, höfðu tekið þá ákvörðun að það væri betra að verða við kröfum Trump en að missa tæplega 400 milljóna dala hernaðaraðstoð sem forsetinn bandaríski hafði fryst.

Yfirvöld Úkraínu hafa lengi forðast það að virðast taka nokkurn þátt í stjórnmálum Bandaríkjanna. Samkvæmt New York Times, sem byggir að miklu leyti á viðtölum við hátt setta embættismenn í Úkraínu, höfðu tveir öldungadeildarþingmenn þó sagt Zelensky að neyðaraðstoðin myndi ekki berast fyrr en forsetinn yrði við kröfum Trump og hæfi tvær rannsóknir sem áttu að þjóna pólitískum hagsmunum hans.



Snemma í september var sú ákvörðun þó tekin að verða við kröfunum þar sem hernaðaraðstoðin þótti mjög mikilvæg vegna baráttu Úkraínumanna við aðskilnaðarsinna í austurhluta landsins, sem studdir eru af Rússlandi.

Verið var að undirbúa opinbera yfirlýsingu Zelensky en fyrir einskæra lukku sluppu þeir fyrir horn.

Til stóð að Zelensky myndi opinbera rannsóknirnar sem Trump vildi þann 13. september. Nokkrum dögum fyrir það var orðið opinbert að Trump hefði fryst hernaðaraðstoðina og þingmenn í Bandaríkjunum beittu Hvíta húsið miklum þrýstingi. Þann 11. september lét Trump eftir og afhenti aðstoðina sem um ræðir.

Zelensky hætti við yfirlýsinguna hið snarasta.

Starfsmenn Trump og bandamenn hans hafa síðan þá ítrekað haldið því fram að hernaðaraðstoðin hafi ekki verið fryst til að setja þrýsting á Zelensky. Framburður margra vitna sem komu að samskiptum Bandaríkjanna og Úkraínu á þessum tíma er þó til marks að það séu hreinar lygar.

Sjá einnig: Sendu Úkraínustjórn hvað hún átti að segja um rannsóknir sem Trump vildi



Rannsóknirnar tvær sem Trump vildi að framkvæmdar yrðu í Úkraínu snúa að tveimur samsæriskenningum. Önnur varðar Joe Biden og hin afskipti Rússa af forsetakosningunum í Bandaríkjunum 2016.

Biden og Burisma

Forsetinn og bandamenn hans hafa sakað Joe Biden um spillingu vegna þess að hann þrýsti á úkraínsk stjórnvöld að reka saksóknara á sama tíma og Hunter, sonur hans, sat í stjórn olíufyrirtækisins. Það eigi Biden að hafa gert til að stöðva rannsókn sem beindist að Burisma.

Ekkert hefur þó komið fram sem bendir til þess að Biden-feðgarnir hafi gert nokkuð ólöglega eða að rannsókn hafi yfir höfuð staðið yfir á Burisma á þeim tíma sem þáverandi varaforsetinn reyndi að koma saksóknara frá. Sú viðleitni var hluti af alþjóðlegum þrýstingi þar sem vestræn ríki töldu saksóknarann ljón í vegi þess að uppræta langvarandi spillingu í Úkraínu.

Hin rannsóknin tengist samsæriskenningu um tölvupóstþjón landsnefndar Demókrataflokksins sem rússneskir hakkarar brutust inn í fyrir forsetakosningarnar 2016 og láku vandræðalegum póstum í gegnum Wikileaks. Trump hefur lengi verið gramur vegna niðurstöðu bandarísku leyniþjónustunnar að rússnesk stjórnvöld hafi háð upplýsingastríð og framið tölvuinnbrot til að hjálpa honum til sigurs.

Trump og bandamenn hans hafa því haldið þeirri hugmynd á lofti um að það hafi í reynd verið úkraínskir útsendarar sem frömdu innbrotið í tölvupóstþjón demókrata og að þeir hafi bókstaflega falið áþreifanlegan tölvupóstþjón í Úkraínu. Markmiðið hafi verið að koma sök á Rússa.

Hugmyndin grundvallast meðal annars á þeirri ranghugmynd að Crowdstrike, tölvuöryggisfyrirtæki frá Kaliforníu sem rannsakaði tölvuinnbrotið, hafi í raun verið í eigu úkraínsks auðkýfings. Crowdstrike, og alríkislögreglan FBI, komust að því að rússneskir hakkarar hefðu staðið að innbrotinu. Trump nefndi Crowdstrike sérstaklega á nafn í símtali sínu við Zelensky í júlí. Tölvupóstþjónn demókrata sem brotist var inn í var heldur ekki eitt áþreifanleg tæki eins og kenningin byggir á heldur skýþjónusta.