Einkunnir eftir tapið í Albaníu: Hjörtur tvistaður

Ísland tapaði 4-2 fyrir Albaníu á útivelli í undankeppni EM 2020 í kvöld.



Íslenska liðið var afleitt í fyrri hálfleik og var marki undir að honum loknum, 1-0.

Gylfi Þór Sigurðsson jafnaði á 47. mínútu en aðeins fimm mínútum síðar kom Elseid Hysaj, fyrirliði Albaníu, heimamönnum aftur yfir.

Kolbeinn Sigþórsson kom inn á 56. mínútu og jafnaði með sinni fyrstu snertingu.

Þá gaf íslenska liðið aftur eftir og Albanir skoruðu tvö mörk undir lokin og tryggðu sér sigurinn.

Gylfi stóð upp úr í slöku íslensku liði en Rúnar Már Sigurjónsson lék einnig vel í seinni hálfleik.

Einkunnagjöf Vísis má sjá hér fyrir neðan.

Byrjunarliðið:

Hannes Þór Halldórsson, markvörður 4

Gat lítið gert í mörkunum en gerði ekkert aukalega. Ekki jafn öruggur og vanalega með landsliðinu.

Hjörtur Hermannsson, hægri bakvörður 2

Afleitur leikur hjá Hirti. Sigraður í loftinu í fyrra marki Albana, leit ekkert sérstaklega vel út í öðru markinu og gaf Odise Roshi alltof mikinn tíma og pláss í þriðja markinu. Er ekki bakvörður og það sást í kvöld.

Kári Árnason, miðvörður 3

Nokkrum sinnum teymdur út úr stöðu og átti í miklum vandræðum allan leikinn. Lagði upp mark Kolbeins. Fékk boltann í sig í þriðja marki Albaníu. Tognaði undir lok leiks.

Ragnar Sigurðsson, miðvörður 4

Skárri en Kári átti ekkert sérstakan leik. Hluti af vörn sem fékk á sig fjögur mörk.

Ari Freyr Skúlason, vinstri bakvörður 5

Í vandræðum með Hysaj. Náði ekki að fylgja eftir góðum leik gegn Moldóvu. Lagði upp gott færi fyrir Jón Daða í seinni hálfleik.

Rúnar Már Sigurjónsson, hægri kantmaður 6

Rólegur í fyrri hálfleik en mjög góður í þeim seinni. Lagði upp mark fyrir Gylfa.

Aron Einar Gunnarsson, miðjumaður 4

Náði engum tökum á miðjunni og var alltaf í eltingarleik. Hysaj fór illa með hann í öðru marki Albana. Einn slakasti landsleikur Arons. Virkaði bensínlaus undir lokin.

Emil Hallfreðsson, miðjumaður 4

Náði engum takti og átti í erfiðleikum. Tekinn af velli snemma í seinni hálfleik.

Birkir Bjarnason, vinstri kantmaður 4

Sást lítið og hefur oft spilað betur.

Gylfi Þór Sigurðsson, framliggjandi miðjumaður 7

Hættulegasti maður Íslands og jafnaði í upphafi seinni hálfleiks. Átti nokkrar ágætar tilraunir.

Jón Daði Böðvarsson, framherji 6

Einmana í fremstu víglínu en fékk meiri þjónustu í seinni hálfleik. Tvisvar nálægt því að skora í seinni hálfleik.

Varamenn:

Kolbeinn Sigþórsson - (Kom inn á fyrir Emil á 56. mínútu) 7

Skoraði með sinni fyrstu snertingu, sitt 25. landsliðsmark. Var mjög öflugur fyrst eftir að hann kom inn á en fékk svo enga þjónustu.

Hörður Björgvin Magnússon - (Kom inn á fyrir Birki á 71. mínútu)

Engin draumainnkoma. Spilaði of lítið til að fá einkunn.

Viðar Örn Kjartansson - (Kom inn á fyrir Jón Daða á 84. mínútu)

Spilaði of lítið til að fá einkunn.