Helgafell hagnaðist um 350 milljónir 

Helgafell eignarhaldsfélag, sem er í jafnri eigu Ara Fenger, Bjargar Fenger og Kristínar Vermundsdóttur, hagnaðist um 351 milljón króna í fyrra og dróst hagnaðurinn saman um rúmlega 1.120 milljónir frá fyrra ári, samkvæmt nýbirtum samstæðureikningi fjárfestingarfélagsins.

Hagnaður Helgafells á síðasta ári kom einkum til vegna hlutdeildar félagsins í afkomu eignarhaldsfélagsins S121, stærsta hluthafa Stoða, eins stærsta fjárfestingarfélags landsins, en hún nam 377 milljónum króna. Á móti var hins vegar tæplega 200 milljóna króna tap af verðbréfaeign Helgafells en í árslok 2018 nam bókfært virði skráðra verðbréfa félagsins – innlendra og erlendra – samtals um 2,3 milljörðum króna.

Helgafell fer með ríflega 28 prósenta hlut í S121 sem á um 65 prósent í Stoðum. Fjárfestingarfélagið Stoðir er á meðal stærstu hluthafa í TM, Símanum og Arion banka. Eigið fé Helgafells nam rúmlega 6 milljörðum króna í lok síðasta árs en í lok þess árs voru einu skuldir félagsins tæplega sex milljóna króna skammtímaskuldir. Sá sem stýrir fjárfestingum Helgafells er Jón Sigurðsson, fjárfestir og stjórnarformaður Stoða, en hann er eiginmaður Bjargar Fenger.