Júlí er sannkallaður martraðarmánuður fyrir Óla Stefán

KA er komið niður í tíunda sæti Pepsi Max deildar karla eftir fjórða deildartap sitt í röð á móti HK í Kórnum í gær. Júlí er langt frá því að vera uppáhaldsmánuður Óli Stefáns Flóventssonar þjálfara Akureyrarliðsins.

Óli Stefán er á sínu þriðja tímabili sem þjálfari í efstu deild og uppskeran er aðeins sex stig af 33 mögulegum í júlímánuði. Það gera aðeins 18 prósent stiga í boði.

Það sem meira er að liðin hans hafa tapað níu af ellefu leikjum sínum í júlímánuði og markatalan er 16 mörk í mínus.

Grindavíkurliðið tapaði 7 af 9 leikjum sínum í júlí þessi tvö tímabil sem Óli Stefán stýrði Grindvíkingum í efstu deild. Óli Stefán tók síðan við liði KA fyrir núverandi tímabil.

Að þessu sinni byrjaði taphrinan fyrr en í síðustu tvö tímabil en KA-liðið tapaði einnig tveimur síðustu leikjum sínum í júní. KA hefur tapað þessum fjórum leikjum á móti liðunum í 11. sæti (Víkingur), 7. sæti (Fylkir), 6. sæti (Valur) og 8. sæti (HK) en HK-ingar hoppuðu reyndar upp um þrjú sæti með sigri sínum á KA-mönnum. HK var í fallsæti fyrir leikinn.

KA-menn fengu síðast stig í Pepsi Max deild karla eftir 2-1 sigur á gömlu lærisveinum Óla í Grindavík 15. júní síðastliðinn eða fyrir sléttum mánuði síðan.

KA-menn þurfa aftur á móti á stigum að halda enda er liðið núna aðeins einu stigi frá fallsæti og gæti endað umferðina í fallsæti nái Víkingar stigi á móti Fylki í kvöld.

KA-menn eiga eftir að tvo leiki í júlí og eru þeir báðir á heimavelli. Skagamenn koma í heimsókn um næstu helgi og svo mæta FH-ingar viku síðar. Hvorugt auðveldir andstæðingar enda bæði meðal fimm efstu liða deildarinnar.

Óli Stefán Flóventsson og tapleikirnir í júlí:

2017 með Grindavík - 3 töp í 4 leikjum (Markatala: 3-12)

2018 með Grindavík - 4 töp í 5 leikjum (Markatala: 5-9)

2019 með KA - 2 töp í 2 leikjum (Markatala: 2-5)

Samtals: 9 töp í 11 leikjum (Markatala: 10-26)