Framundan er Landsmót 50+ sem fram fer í Neskaupstað næstu helgi, undirbúningur er á lokastigum og koma fjölmargir sjálfboðaliðar að því, bæði ungmennfélagsfólk af öllu landinu og heimafólk í Fjarðabyggð.

Skipulag og stjórn allra landsmóta UMFÍ hefur verið í höndum Ómars síðustu fimmtán ár.
„Fyrsta minningin mín er frá landsmóti á Sauðárkróki, árið 1971 en faðir minn var þá í landsmótsnefndinni. Ekki hefði nú hvarflað að mér að það yrði síðar mitt aðalstarf. Mótið í Neskaupstað verður tuttugasta og sjöunda landsmótið sem ég stýri, þó er ég nú ekkert svakalega gamall,“ segir Ómar hress en hann hefur veri í forsvari fyrir mót UMFÍ frá árinu 2004.
„Ég er löngu farinn að funda með sveitarfélögum vegna mótanna 2020,“ bætir hann við og segir talsverða eftirspurn eftir því að fá að halda landsmót.

Hvert mót er áskorun. Mótið í Neskaupstað er þar engin undantekning. Það verður sérstaklega skemmtilegt og forréttindi að taka á móti nokkur hundruð manns, keppnisfólki allt upp í áttrætt og rúmlega það,“ segir Ómar og bætir við að hinn eini sanni ungmennafélagsandi svífi yfir vötnum, við undirbúning allra móta og auðvitað á þeim líka.

Það er pláss fyrir alla og allir geta verið með á eigin forsendum. Ekki þarf að vera meðlimur í íþróttafélagi til þess að vera með og ekki þarf heldur að vera nein íþróttahetja, þó þær séu auðvitað velkomnar. Það eru einfaldlega allir velkomnir í Neskaupstað um næstu helgi,“ segir Ómar.

Nánari upplýsingar má fá með því að senda tölvupóst á netfangið umfi@umfi.is.
UMFí er einnig á facebook og á Instagram
Þessi kynning er unnin í samstarfi við UMFÍ