Ný rennibraut og kaldur pottur í endurbættri Breiðholtslaug

Kulda- og rennibrautaróðir Breiðhyltingar og nærsveitungar þeirra geta tekið gleði sína á ný því í hverfissundlauginni, Breiðholtslaug við Austurberg, hefur verið tekinn í notkun kaldur pottur auk endurbættrar rennibrautar.

Framkvæmdir hófust í nóvember á síðasta ári og var rennibrautum lokað þá, í fyrstu var stefnt á opnun nýrrar rennibrautar 20.desember og kalda pottsins snemma á árinu. Annað átti þó eftir að koma á daginn.

Framkvæmdum er nú lokið og var endurbætt Breiðholtslaug opnuð í dag. Þá verða sett upp leiktæki með tartan undirlagi á bakka laugarinnar en vinna við þau heldur áfram næstu daga.

Mikil aðsókn var í laugina og voru kaldi potturinn og gula rennibrautin vinsælir áfangastaðir laugargesta.