Reyndu 77 sendingar inn í vítateig KA en töpuðu samt

Stjörnumenn voru mjög framarlega í flestum tölfræðiþáttunum í 5. umferð Pepsi Max deildar karla í fótbolta og það þrátt fyrir að ganga stigalausir af velli eftir tap á heimavelli á móti KA.

Þegar tölfræðigreining Instat er skoðuð nánar kemur ýmislegt athyglisvert í ljós úr þessum leik sem endaði 2-0 fyrir KA.

Það eru nokkur dæmi í tölfræðinni um yfirburði Stjörnuliðsins í þessum leik.

Stjörnumenn reyndu sem dæmi 77 sendingar inn í vítateig í leiknum og 37 þeirra heppnuðust. Næsta lið var með 43 sendingar inn í teig og 22 heppnaðar en mótherjar Garðabæjarliðsins í KA voru aðeins með 19 sendingar inn í teig og þar heppnuðust aðeins níu þeirra.

Stjarnan reyndi þannig 33 fyrirgjafir í leiknum á móti aðeins 8 hjá öllu KA-liðinu.

Stjörnumenn reyndu líka 22 skot á móti 8 hjá KA. Stjarnan var þar í 1. sæti yfir lið deildarinnar í fimmtu umferðinni en KA-liðið aðeins í 11. sæti. Varnarmenn KA komust fyrir ellefu af þessum skotum Stjörnunnar og þrjú þeirra enduðu í slá eða stöng.

Stjarnan og KA áttu aftur á móti jafnmörg skot á markið í leiknum en fjögur hvort lið.

Það sem meira er að liðin sköpuðu bæði fimm færi í leiknum og skot Garðbæinga voru því ekki að koma úr nógu góðum færum.

Stjörnuliðið var með boltann í 33 mínútur og 43 sekúndur eða 55,8 prósent leiktímans. KA-liðið var átta mínútum færra með boltann í leiknum.

Stjörnumenn höfðu líka betur í baráttunni því þeir unnu 56 prósent af tæklingum leiksins (68 á móti 54) sem og fleiri skallaeinvígi eða 28 á móti 22 sem gera líka 56 prósent.

Flestar reyndar sendingar liða inn í teig í 5. umferð Pepsi Max deildar karla:

(Tölur frá Instat)

77 - Stjarnan

43 - Valur og Fylkir

40 - KR

32 - ÍA

30 - Breiðablik og ÍBV

29 - Grindavík

28 - KA

23 - FH

19 - Víkingur og KA

Flestar reyndar sendingar leikmanna inn í teig í 5. umferð Pepsi Max deildar karla:

(Tölur frá Instat)

15 - Þórarinn Ingi Valdimarsson, Stjörnunni

15 - Hilmar Árni Halldórsson, Stjörnunni

14 - Heiðar Ægisson, Stjörnunni

14 - Daði Ólafsson, Fylki

10 - Óskar Örn Hauksson, KR

10 - Guðjón Pétur Lýðsson, Breiðabliki

Flestar reyndar fyrirgjafir liða í 5. umferð Pepsi Max deildar karla:

(Tölur frá Instat)

33 - Stjarnan

24 - Fylkir

22 - ÍBV

19 - KR, HK og Breiðablik

16 - Valur

11 - ÍA

10 - Grindavík

8 - KA

7 - FH og Víkingur

Flestar reyndar fyrirgjafir leikmanna í 5. umferð Pepsi Max deildar karla:

(Tölur frá Instat)

8 - Heiðar Ægisson, Stjörnunni

8 - Þórarinn Ingi Valdimarsson, Stjörnunni

8 - Daði Ólafsson, Fylki

8 - Arnar Sveinn Geirsson, Brreiðabliki

7 - Þorsteinn Már Ragnarsson, Stjörnunni