Chris Coleman lifði af ellefu mánuði í Kína

Þolinmæði stjórnarmanna knattspyrnliða í Kína er ekki alltaf mikil og því hefur Chris Coleman nú fengið að kynnast.

Hann hefur verið rekinn frá Hebei China Fortune eftir aðeins ellefu mánuði í starfi. Reyndar hefur gengið afar illa hjá Coleman og hans liði.

Hebei er í næstneðsta sæti kínversku úrvalsdeildarinnar og hefur aðeins unnið einn af síðustu níu leikjum sínum.

Stuðningsmenn hafa löngu fengið nóg og hafa mætt með fána á síðustu leiki þar sem á stendur: „Þú ert rekinn, farðu heim og mamma þín vill fá þig heim í mat.“

Coleman sló í gegn sem þjálfari er hann fór með lið Wales alla leið í undanúrslit á EM 2016. Hann fór svo til Sunderland og náði ekki að bjarga liðinu frá falli.

Þá fór hann til Kína og virðist vera búinn að fella lið þar líka.