Snjókoma í kortunum undir lok vetrar

Það var snjókoma klukkan sex í morgun bæði á Egilsstöðum og á Dalatanga og þá mun snjóa um tíma á norðanverðu landinu eftir því sem  hitaskil sem nálguðust landið úr austri í nótt færast vestur á bóginn.

Má sérstaklega búast við snjókomu á fjallvegum að því er segir í hugleiðingum veðurfræðings á vef Veðurstofu Íslands, en sunnan heiða mun úrkoman falla sem rigning. Vindáttin er austlæg og verður strekkingur nokkuð víða en allhvasst með suðurströndinni.

Á morgun, á síðasta degi vetrar, er áfram spáð austanátt og verður vindhraði víða á bilinu 8 til 13 metrar á sekúndu en 13 til 18 metrar á sekúndu með suðurströndinni:

„Margir myndu eflaust vilja hafa rólegri vind á sumardaginn fyrsta. Góðu fréttirnar eru þær að vel ætti að sjást til sólar um tíma á öllu landinu. Hitinn verður eins og best gerist á þessum degi, ætti að ná kringum 15 stig í mörgum landshlutum, svalara þó með austurströndinni þar sem andar beint af hafi. Að lokum ber að taka fram að útlit er fyrir að það fari að rigna á sunnanverðu landinu að kvöldi fimmtudags,“ segir í hugleiðingum veðurfræðings.

Veðurhorfur á landinu:

Austan 10-18 m/s og rigning með köflum S- og V-til í dag. Norðaustan 8-13 á NA-verðu landinu með slyddu eða snjókomu framan af degi, síðan rigningu eða súld. Hlýnandi veður, hiti 5 til 13 stig síðdegis, hlýjast S-lands.

Austan og suðaustan 5-13 á morgun með vætu af og til, en úrkomulítið NA-lands. Hlýnar heldur í veðri.

Á miðvikudag:

Austan- og suðaustanátt, víða 8-13 m/s og rigning með köflum, en úrkomulítið norðaustanlands eftir hádegi. Hiti 6 til 14 stig.

Á fimmtudag (sumardagurinn fyrsti):

Austan 8-13, en 13-18 með suðurströndinni. Þurrt á landinu og bjart nokkuð víða. Fer að rigna sunnan- og austanlands um kvöldið. Hiti frá 7 stigum með austurströndinni, upp í 16 stig á Vesturlandi.

Á föstudag og laugardag:

Austlæg átt og milt veður. Rigning með köflum, en úrkomulítið vestanlands.