Ástþór Magnússon kannar möguleika á flugrekstri

Hugmynd að stofnun nýs íslensks flugfélags hefur verið kynnt á vefsíðunni flyicelandic.is en að hugmyndinni standa miklir reynsluboltar, þ.á.m. Ástþór Magnússon, fyrrum forsetaframbjóðandi og athafnamaður.

Verkefnið hefur þegar tryggt sér aðgang að flugvélaflota Airbus að sögn Jóels Kristinssonar, talsmanns verkefnisins, en hann er fenginn í gegn um flugvélaleiguna Jet Banus en Ástþór kemur að rekstri þessa fyrirtækis ásamt portúgölskum félögum sínum.

Á vefsíðunni er hugmyndinni að verkefninu lýst þannig að FlyIcelandic sé til þess gert að koma fólki og fyrirtækjum saman sem „vilja gerast þátttakendur í nýju flugfélagi sem farþegar, fjárfestar og samstarfsaðilar.“ Þá eru fyrrum starfsmenn WOW air sérstaklega hvattir til að taka þátt í verkefninu.

Flugfélagið á að vera laust við einnota plastnotkun og er þar kynnt að máltíðir sem boðið yrði upp á yrðu bornar fram með vistvænum hætti.

Þátttakendur í verkefninu fengju tækifæri til að kaupa svokallaðar EcoMiles sem samkvæmt vef verkefnisins eru „flugmílur á heildsöluverði.“ Í samtali við mbl.is sagði Jóel  kerfið byggja á rafmyntakerfi sem gerði fólki kleift að „taka þátt í að selja og fljúga og annað.“

Á vefsíðunni er fyrirhuguð þjónusta félagsins útlistuð en þar eru meðal plastlausu máltíðanna hugmyndir um að eigendur EcoMiles geti keypt svokölluð hopp sæti á lágu verði stuttu fyrir flug, að þeir fái forgang á VIP þjónustu, geti fengið innritaðan aukafarangur endurgjaldslaust o.fl.

Vefsíða FlyIcelandic og kynning hennar er kostuð af Valhalla ehf., sem er félag sem stofnað er af Ástþóri Magnússyni og vinnur að uppbyggingu íslensks samfélags í Portúgal. Á heimasíðu Valhalla stendur að samfélagið sé fyrir ellilífeyrisþega sem „vilja nýta sér nýjar skattareglur Portugal og tvísköttunarsamning við Ísland til að eignast heimili í sólinni sem greitt er fyrir með skatthagræðingu.“

Í samtali við fréttastofu sagðist Ástþór hafa unnið mikið að því að koma Block-Chain kerfi inn í flugrekstur, og það jákvæða við það væri að einstaklingar gætu sjálfir keypt og selt á netinu, án þess að þurfa að borga fyrir það vegna þess að þeir gerðu það sjálfir og ekki væri hægt að falsa flugmiðana í þessu kerfi.

Aðspurður um hans hlutverk í FlyIcelandic verkefninu sagðist hann ekki ætla að flytja aftur til Íslands til að fara í flugrekstur. Hann kæmi hins vegar með áratuga reynslu að borðinu, „það sem getur verið hættulegt í flugrekstri er ef fólk er ekki með næga reynslu í því, það er eitt sem háði WOW, það byggði ekki á þessari löngu reynslu sem ég get komið með að borðinu í samstarfi við félaga mína.“

„Þegar WOW var að falla bauð ég þeim 4-5 vélar ef þau vildu, en svo varð ekkert úr því.“