Hátt í hundrað írskra sjálfboðaliða leita Jóns Þrastar

Hátt í hundrað írskra sjálfboðaliða, ásamt fjölskyldu og vinum Jóns Þrastar Jónssonar, leita hans nú í Dyflinni en hans hefur verið saknað í tvær vikur. Utanríkisráðuneytið hefur vakið máls við írsk yfirvöld á hugsanlegri aðkomu írskra björgunarsveita í málinu og þá starfa íslensk og írsk lögregluyfirvöld náið saman.

Jón Þröstur fór til Dyflinnar á Írlandi ásamt kærustu sinni um þarsíðustu helgi til að skoða kastala og taka þátt í pókermóti. Hann gekk út af hóteli sínu í Dyflinni eftir eins og hálfs dags dvöl, án síma, veskis og vegabréfs, og hefur ekki sést síðan.

Lögregla í Dyflinni fer með rannsókn málsins en fjölskylda Jóns Þrastar fór út til Írlands að leita hans þegar hann hafði verið týndur í tvo daga. Leitað hefur verið að Jóni Þresti á skipulögðum leitarsvæðum í borginni undanfarna daga. Í morgun hófst umfangsmikil leit að sögn Katrínar Bjarkar Birgisdóttir, mágkonu hans en hátt í hundrað sjálfboðaliðar eru á ferðinni. 

„Við vorum að senda út skipulagða hópa með hópstjórum. Þetta er eitthvað sem við skipulögðum á svæðinu. Við erum búin að mappa út svæði sem eru í eins kílómetra radíus frá því þar sem hann sást seinast. Það sem við erum aðallega að gera núna er að reyna fá upplýsingar. Við erum ekki beint að leita eða hengja upp skilti en við erum að spurja alla.

Gangandi vegfarendur og við erum að banka á öll hús og við erum með sér svæði þar sem hann hvarf því við erum að vonast til þess að fólk sem er með rútínu sem hafi verið þarna þegar hann hvarf, því í dag eru tvær vikur sem hann hvarf, og vonast til að það hafi séð hann,“ segir Katrín Björk.

Sveinn Guðmarsson, fjölmiðlafulltrúi utanríkisráðuneytisins, segir að borgaraþjónstan hafi haft aðkomu að málinu frá 10. febrúar síðasliðnum og stutt fjölskyldunni eins og kostur er.

Í vikunni hafi fjölskyldumeðlimir verið boðaðir á fund í ráðuneytinu ásamt lögreglu, þar sem farið var yfir málið sem sé þó algjörlega á forræði írskra yfirvalda.

Írska lögreglan sé með málið til rannsóknar en virkt samband sé milli írsku og íslensku lögreglunnar í málinu og að á milli þeirra ríki mikið traust.

Á Írlandi eru starfræktar björgunarsveitir, Civil defence Ireland, sem eru líkt og íslensku björgunarsveitirnar sjálfboðaliðasamtök.

Sveinn staðfestir að íslensk stjórnvöld hafi vakið máls á hugsanlegri aðkomu þessarar stofnunar við írskt stjórnvöld en ekki liggur fyrir hvort af því verði.

Katrín Björk segir að lögreglan á Íralandi sé í mjög góðu samstarfi við fjölskylduna.

Enn séu þó engar vísbendingar um hvar Jón Þröstur gæti verið en meðal þess sem verið er að leita af eru prins sígaretturpakkar en vitað er að hann var með slíkan pakka meðferðis. Sá sígarettupakki fáist ekki á Írlandi.

„Allir hópstjórar eru með mynd af þessu og það er verið að leita líka að tómum sígarettupakka og þessum stubbum til að vonadi rekja leiðina hans,“ segir Katrín Björk og bætir við að leitað verði í allan dag.

Bræður Jóns Þrastar ræddu um hvarfið í vinsælum írskum spjallþætti í gærkvöldi með það fyrir augum að vekja athygli á málinu.