Telur að grípa þurfi til fyrirbyggjandi aðgerða

Sonja Ýr Þorbergsdóttir, formaður BSRB, segir mikið áhyggjuefni að vinnuslysum fari fjölgandi meðal starfsmanna hins opinbera. Grípa þurfi til fyrirbyggjandi aðgerða, álag sé of mikið og það sé upplifun starfsfólks að störfin sem hurfu í hruninu hafi ekki skilað sér til baka. Í kvöldfréttum Stöðvar 2 í gær kom fram að um þriðjungur allra vinnuslysa á Íslandi árið 2017 voru meðal starfsmanna hins opinbera, en hlutfallið hefur farið hækkandi. Þreyta, álag og kulnun eru meðal áhættuþátta en Sonja Ýr Þorbergsdóttir, formaður BSRB, segir brýnt að bregðast við þessari þróun.

„Það auðvitað kannski reynir mest á auðvitað þar sem er sólarhrings vaktavinna þar sem það er þreyta og verið að hlaupa hratt, en heilt yfir þá er ljóst að félagsmenn aðildarfélaga BSRB eru að kvarta yfir ástandi á sínum vinnustöðum og það þurfi að grípa til einhverra aðgerða af því að álagið sé of mikið, og þá skiptir raunverulega engu máli hvort að þú sért á heilbrigðisstofnun eða hvort þú sért bara hefðbundnu skrifstofusktarfi,“ segir Sonja. 

Hún segir verkefnum hafa fjölgað og að færri hendur sinni þeim nú en áður. En hvað veldur þessari þróun?

„Upplifun fólks er sú að störfin sem hurfu í hruninu hafi ekki skilað sér til baka en það eru engar tölur raunverulega til um það sem sýna það með skýrum hætti. En við vitum það hins vegar að verkefnin eru bara að aukast. Það er aukin krafa á þjónustu á allar stofnanir hjá ríki og sveitarfélögum og það reynir meira á þær heldur en áður maður reynir,“ segir Sonja.

60% þeirra starfsmanna hins opinbera sem lentu í vinnuslysi árið 2017 voru konur en það skýrist eflaust af því að um tveir þriðju hlutar starfsmanna ríkis og sveitarfélaga eru konur. „Í grunninn er það þannig að konur vinna mun lengri vinnuviku heldur en karlar ef að maður telur með stundirnar sem þær vinna heimafyrir í ólaunuðu störfunum,“ segir Sonja.