Þriðji Portúgalinn til Eyjamanna

Portúgalski miðjumaðurinn Telmo Castanheira er genginn til liðs við Pepsi-deildarlið ÍBV og gerir tveggja ára samning við félagið.

Frá þessu er greint á Fótbolti.net í dag.

Castanheira er 24 ára gamall og kemur til Eyjamanna frá portúgalska B-deildarliðinu Trofense þar sem hann hefur skorað 3 mörk í 14 leikjum á yfirstandandi leiktíð.

Hann var áður á mála hjá portúgalska stórveldinu Porto en hefur flakkað á milli liða í Portúgal undanfarin ár.

Portúgalinn Pedro Hipolito tók við ÍBV síðastliðið haust og er nú búinn að ná í þrjá samlanda sína til félagsins því áður höfðu þeir Rafael Veloso og Diego Coelho samið við Eyjamenn.