Perisic óskar eftir sölu frá Inter

Ivan Perisic hefur óskað eftir því að vera seldur frá ítalska stórveldinu Inter Milan með það fyrir augum að komast að í ensku úrvalsdeildinni.

Samkvæmt heimildum Gazzetta dello Sport er Inter tilbúið að selja þennan króatíska kantmann berist tilboð upp á 30-35 milljónir punda.

Perisic var orðaður við Manchester United allt síðasta sumar en allt kom fyrir ekki og er ekki talið líklegt að Ole Gunnar Solskjær hafi áhuga á Króatanum.

Hins vegar hefur Arsenal spurst fyrir um kappann en Lundúnarliðið vill fá Perisic að láni með möguleika á að kaupa hann næsta sumar. Það hugnast ekki forráðamönnum Inter en nú er innan við vika í að félagaskiptaglugginn loki.

Perisic er 29 ára gamall og hefur verið á mála hjá Inter síðan árið 2015 en hann hefur einnig leikið fyrir Wolfsburg, Dortmund og Club Brugge.