Töldu svör fimm vina fjarstæðukennd

Þungir dómar féllu í Héraðsdómi Reykjaness í gær þegar allir sakborningar í Bitcoin-málinu voru dæmdir til refsingar. Þyngstu refsinguna hlaut Sindri Þór Stefánsson, eða fjögurra og hálfs árs fangelsisvist. Dómarinn í málinu taldi sannað að Sindri hefði verið höfuðpaurinn og þaulskipulagt innbrot í gagnaver.

Af þeim sjö sem ákærðir voru í málinu tilheyra fimm vinahóp sem þekkst hefur um langt skeið og samanstendur af þeim Sindra Þór, Hafþóri Loga Hlynssyni, bræðrunum Matthíasi Jóni og Pétri Stanislav Karlssonum og Viktori Inga Jónassyni. Voru þeir meðal annars í Facebook-hóp sem kenndur var við „föruneytið“.

Sjá einnig: Steinsofandi á sófanum meðan þjófar létu greipar sópa í gagnaverinu

Í dómi Héraðsdóms Reykjaness kom fram að af gögnum málsins og framburði þeirra fyrir dómi yrði ráðið að tengsl þeirra væru sterk og samskipti mikil og náin. Hafþór Logi hefur búið á Spáni frá desemberlokum 2017, Viktor Ingi flutti þangað 27. eða 28. desember og þá er Sindri Þór sömuleiðis fluttur til Spánar.

Fjarstæðukenndar útskýringar á meintum höfuðpaur

Sindri Þór játaði fyrir dómi að hafa farið inn í gagnaver í Borgarnesi og gagnaver Advania að Ásbrú en neitaði að hafa komið að skipulagningu innbrotanna. Þá neitaði hann ásökunum um að hafa brotist inn í gagnaver BDC Mining og Algrim Consulting ásamt tilraun til að brjótast inn í gagnaver BDC Mining.

Sagði Sindri fyrir dómi að hann hefði verið að fylgja skipunum annarra manna. Í innbrotinu í gagnaver Advania hefði hans hlutverk verið að villa um fyrir öryggisvörðum með því að setja af stað öryggiskerfi nærri Grindavík.

Þá hefði hann verið boðaður að gagnaveri Advania að Ásbrú en Sindri sagði að hann hefði ekki haft neitt val um annað. Málið hefði verið gengið of langt og hann þorði ekki að segja nei við aðilana sem skipuðu honum fyrir. Hann vildi ekki gefa upp um hverja var að ræða við aðalmeðferð málsins og bar fyrir sig ótta um öryggi sitt og fjölskyldu sinnar.

Dómarinn spurði við aðalmeðferðina hvort hann væri að taka á sig sök fyrir aðra. Sindri svaraði því neitandi en sagðist ekki hafa skipulagt innbrotin.

Ákæruvaldið var þeirrar skoðunar að Sindri hefði verið höfuðpaur málsins, aðrar útskýringar væru fjarstæðukenndar og uppspuni. Var Ingimundur Einarsson, héraðsdómari við Héraðsdóm Reykjaness, sammála þeirri niðurstöðu.

Ingimundur taldi Sindra hafa skipulagt innbrotin, undirbúið þau í þaula og notið liðsinnis annarra ákærðu.

Reyndu að hylja slóð og villa um fyrir lögreglu

Brotin væru stórfelld, ekki einungis vegna þess verðmætis sem stolið var hverju sinni, heldur einnig vegna þeirrar aðferðar sem var viðhöfð við undirbúning og í aðdraganda þeirra. Reyndu sakborningar til hins ýtrasta að hylja slóð sína og villa um fyrir lögreglu.

Augljóst þyki að allir hafi þeir sammælst um að veita lögreglu engar upplýsingar og nefna aldrei samverkamenn. Var það mat dómarans að allir hefðu sakborningarnir unnið sér til refsingar.

Við aðalmeðferð málsins var til að mynda Hafþór Logi Hlynsson, sem hlaut 20 mánaða fangelsisdóm, spurður hvers vegna þeir Sindri Þór hefðu verið í svo miklum samskiptum kvöldið og nóttina sem brotist var inn í gagnaver Advania. Sindri deildi með Hafþór upplýsingar um framgang innbrotsins og virtist Hafþór fagna því þegar vel gekk.

Hafþór, sem nýlega var dæmdur í tólf mánaða fangelsi fyrir peningaþvætti í aðskildu máli, sagði við aðalmeðferðina að hann hefði ekki áttað sig á því hvers vegna Sindri deildi þessum upplýsingum með honum. Þeir væru vanir að deila öllu, enda nánir vinir, og Hafþór hefði einfaldlega verið að samgleðjast velgengni vinar síns.

Símagögn lykilsönnunargagn

Lykilsönnunargagnið í málinu voru ítarlegar skýrslur lögreglu um notkun síma og símtækja allra sakborninga. Af þeim má sjá staðsetningu símanúmera hverju sinni út frá tengingum þeirra við fjarskiptamöstur.

Rannsakað var sérstaklega hvort símar sakborninga hefðu verið í nágrenni við vettvang innbrotanna um það leyti sem brotist var inn hverju sinni og hvernig símar þeirra ferðuðust í aðdraganda og kjölfar hvers brots, auk annarra atriða sem tengdust innbrotunum.

Ingimundur tekur fram í niðurstöðu sinni að gögn þessi höfðu verulega þýðingu við úrlausn málsins.

Sjá einnig: Segir langstærsta sönnunargagn Bitcoin-málsins ómarktækt

Starfsmaður rannsóknardeildar lögreglunnar á höfuðborgarsvæðinu sagði við aðalmeðferð málsins að mynstrið í símagögnum sakborninga væri kýrskýrt dæmi um skipulagða brotastarfsemi.

Rannsóknin benti meðal annars til þess að símar Sindra Þórs og Viktors Inga Jónssonar, sem var einn af þeim sem hlaut dóm, hefðu ferðast á sama tíma frá Ásbrú til Hafnarfjarðar þegar reynt var að brjótast inn í gagnaver.

Vildi harða refsingu til að setja fordæmi

Stjórnarformaður BDC Mining sagði við aðalmeðferð málsins að innbrotin hefðu haft talsverð áhrif á orðspor Íslands þegar kæmi að gagnaverabransanum. Umræða um öryggismál hér á landi og tryggingamál hafi gert samtölin við erlenda fjárfesta þyngri.

Alda Hrönn Jóhannsdóttir sótti málið fyrir embætti lögreglustjórans á höfuðborgarsvæðinu. Hún kom inn á þetta í málflutningi sínum þegar hún fór fram á að Sindri Þór yrði dæmdur til fimm ára fangelsisvistar. Verjandi Sindra sagði það ekki hlutverk dómsins að setja fordæmi til að vernda orðspor Íslands sem gagnaversstað.

Dæma ætti eftir lagabókstafnum og dómafordæmum.

Fastlega má búast við að öllum dómum verði áfrýjað til Landsréttar enda höfðu verjendur sakborninga farið fram á mun vægari refsingu.

Hvorki tangur né tetur fundist af tölvunum

Sjö voru ákærðir í málinu og hlutur þeirra og hlutverk misjöfn í innbrotunum. Samkvæmt ákærunni var 2.250 tölvuíhlutum stolið. Þar á meðal 350 bitcoin-tölvum, hátt í 500 aflgjöfum og spennum, yfir 800 skjákortum, 120 móðurborðum og jafnmörgum örgjörvum.

Andvirði búnaðarins var metið um 96 milljónir króna en tjón fyrirtækjanna er talið nema 135 milljónum. Búnaðurinn er enn ófundinn.

Matthías Jón Karlsson var dæmdur í tveggja og hálfs árs fangelsi, Hafþór Logi Hlynsson fékk 20 mánaða fangelsisdóm, Pétur Stanislav Karlsson og Viktor Ingi Jónasson fengu 18 mánaða fangelsisdóm.

Ívar Gylfason fékk 15 mánaða fangelsisdóm en þar af eru tólf mánuðir skilorðsbundnir. Kjartan Sveinarsson fékk sex mánaða dóm, skilorðsbundinn til tveggja ára.