Erlent

Segir Trump víst hafa skipað sér að brjóta lög

Samúel Karl Ólason skrifar
Michael Cohen, eftir að hann var dæmdur til þriggja ára fangelsisvistar á miðvikudaginn.
Michael Cohen, eftir að hann var dæmdur til þriggja ára fangelsisvistar á miðvikudaginn. AP/Craig Ruttle
Michael Cohen, fyrrverandi lögmaður Donald Trump, forseta Bandaríkjanna, segir Trump víst hafa vitað af því að greiðslur til tveggja kvenna í aðdraganda kosninganna 2016 hafi verið ólöglegar. Cohen segir Trump hafa skipað sér að sjá um greiðslurnar því hann hafi haft áhyggjur af því hvaða áhrif sögur þeirra um meint kynferðisleg sambönd Trump og þeirra myndu hafa á forsetakosningarnar.

Þetta sagði Cohen í sjónvarpsviðtali sem birt var í Bandaríkjunum í morgun og var það í fyrsta sinn sem hann tjáir sig eftir að hann var dæmdur í þriggja ára fangelsi, meðal annars vegna þessara greiðslna. Hann mun hefja afplánun þann 6. mars.

Klámmyndaleikkonan og leikstjórinn Stormy Daniels, sem heldur því fram að hún hafi sængað hjá Trump nokkrum mánuðum eftir að Melania Trump fæddi yngsta barn forsetans, fékk 130 þúsund dali frá Cohen einungis nokkrum vikum fyrir kosningarnar 2016.

Þá hefur fyrirtækið American Media Incorporated, sem gefur út National Enquirer, viðurkennt að hafa keypt sögu Karen McDougal, Playboy fyrirsætu, um meint framhjáhald Trump og hennar fyrir 150 þúsund dali. Útgefandi National Enquirer er David J. Pecker, vinur Trump til langs tíma og er sagður hafa látið Cohen vita af því að Stormy Daniels ætlaði sér að selja sögu sína til fjölmiðla.

Sjá einnig: Segist ekki hafa skipað Cohen að brjóta lög



Saksóknarar segja greiðslur þessar vera brot á kosningalögum þar sem þær fari langt yfir hámarkið sem einstaklingar mega gefa til framboðs stjórnmálamanns, sem er 2.700 dalir.

Cohen var í gær dæmdur til þriggja ára fangelsisvistar fyrir brot á kosningalögum, skattsvik og að hafa logið að þingnefnd um viðleitni hans til að tryggja byggingu Trump-turnar í Moskvu í aðdraganda kosninganna.

Í kjölfar þess hefur Trump sagt að hann hafi ekki vitað af því að greiðslurnar væru ólöglegar. Hann hefur einnig haldið því fram að um einkaviðskipti væri að ræða og greiðslurnar hefðu ekki verið ólöglegar. Ef eitthvað hefði verið ólöglegt bæri Cohen alla ábyrgð.

Cohen segir þó að forsetinn hafi skipað honum að gera þetta og að hann hafi einnig verið meðvitaður um að þeir væru að brjóta lögin. Tilgangurinn hefði verið að hjálpa framboði Trump. Cohen segir enn fremur að hann sé reiður út í sjálfan sig og hann hafi brotið lög vegna blindrar hollustu við Trump.

„Ég gaf manni hollustu mína, sem í sannleikanum sagt, á hollustu ekki skilið,“ sagði Cohen.

Donald Trump, forseti Bandaríkjanna.AP/Evan Vucci
Hann segir engan trúa því að Trump hafi ekki vitað hvað væri í gangi. Allar ákvarðanir í fyrirtæki forsetans hafi verið bornar undir Trump sjálfan.

„Hann veit sannleikann. Ég veit sannleikann. Aðrir vita sannleikann. Hér er sannleikurinn: Íbúar Bandaríkjanna, íbúar heimsins, ekki trúa því sem hann segir. Þessi maður segir ekki sannleikann og það er sorglegt að ég sé að taka ábyrgð á ódæðum hans.“

Cohen gaf einnig lítið fyrir þær ásakanir Trump að hann hafi einungis játað sekt til að koma skömm á „forsetann“, eins og Trump sjálfur talaði um sig í þriðju persónu.

Vill ekki vera vondi karlinn

George Stephanopoulos, fréttamaður ABC, spurði Cohen einnig út í lygar hans til þingmanna og aðrar sakfellingar fyrir skattsvik og bankasvik og spurði af hverju fólk ætti að trúa honum nú.

Cohen sagði að fólk ætti að trúa honum því saksóknarar hafi tekið fram að þær upplýsingar sem hann hafi veitt hafi verið trúverðugar og hjálpsamar.

„Þeir bjuggu yfir töluvert af upplýsingum sem sannreyna að ég er að segja sannleikann.“

Cohen tók einnig fram að hegðun Trump hefði breyst verulega eftir að hann tók við embætti forseta Bandaríkjanna. Trump sé ekki lengur sami maðurinn og hann þjónaði í rúman áratug.

„Ég held að starfsálagið sé mun meira en hann átti von á. Þetta er ekki eins í fyrirtæki hans þar sem hann gat gefið skipanir og fólk framfylgdi þeim í blindni. Það er kerfi þarna,“ sagði Cohen. Þá sagðist hann vonast til þess í framtíðinni að hans yrði minnst sem manns sem hefði reynt að hjálpa til við að bæta Bandaríkin. Hann vildi ekki vera „vondi karlinn“ í þessari tilteknu sögu.

Viðtalið við Cohen má sjá, í tveimur hlutum, hér að neðan.

Bandaríkin Donald Trump

Tengdar fréttir

Rannsaka eyðslu í tengslum við embættistöku Trump

Alríkissaksóknarar í New York hafa hafið sakamálarannsókn á því hvort að nefnd sem bar ábyrgð á innsetningu Donald Trump í embætti hafi misfarið með hluta þess fé sem hún hafi safnað.

Mest lesið


Fleiri fréttir

Sjá meira


×

Mest lesið