Sættist ekki eftir uppspuna með klækjum

Forstjóri Samherja telur að það hafi aldrei hvarflað að seðlabankastjóra að leita sátta við fyrirtækið enda hafi sakirnar verið búnar til með klækjum.

Már Guðmundsson, seðlabankastjóri, sagði í Sprengisandi á Bylgjunni í gær, að hann hefði kannað þann möguleika að setja mál Samherja í sáttaferli áður en fyrirtækið var kært fyrir brot á gjaldeyrislögum í fyrra skiptið.

„Ég sagði við mína lögfræðinga og aðra; er ekki hægt að setja þetta mál í sáttaferli, vegna þess að svona mál eru flókin. Og þá var kallað á hæstaréttarlögmann, sem sagði bara réttilega og las upp úr lögunum, þú mátt það ekki, þá ert þú að brjóta lögin," sagði Már í Sprengisandi í gær.

Már bætti við að honum hefði borið skylda til að leggja fram kæru þar sem grunur lék á því að alvarlegt brot á lögum um gjaldeyrisviðskipti hefði verið framið.

Þorsteinn Már Baldvinsson, forstjóri Samherja, telur ótrúverðugt að Már hafi viljað leita sátta eftir að hafa beitt klækjum til þess að búa til ásakanir um meint brot. 

„Hann er að gefa það í skyn að við höfum brotið gjaldeyrislögin í þessu viðtali í gær, enn og aftur, þegar það er búið að fara í gegnum allar sakir," segir Þorsteinn. „Þegar að þú ert að beita klækjum til að búa til einhver brot, sem að síðan er sýnt fram á að eru röng, held ég að viljinn til sátta sé lítill."

„Ég held að það hafi aldrei hvarflað að Má Guðmundssyni að leita sátta, enda er ekki hægt að sættast á eitthvað sem er ekki brot. Hann stendur allsber maðurinn með að það eru engin brot og hann verður einn daginn að kyngja því."

Þorsteinn segir undirbúning að skaðabótamáli fyrirtækisins gegn seðlabankanum hafinn og breyta yfirlýsingar seðlabankastjóra þar engu um.

„Þetta sýnir bara enn frekar þráhyggjuna í honum og í raun valdníðsluna. Hann er að nýta þetta embætti sem menn eiga að vera virðingu fyrir."

Hann bendir á að bankaráð eigi eftir að fjalla um málið á næstunni.

„Ég stend enn þá við mín orð, það á að reka þennan mann úr bankanum og ég held að það séu allar líkur á því að ég komi þessum manni í fangelsi," segir Þorsteinn. 

Seðlabankastjóri sagði í kvöldfréttum Stöðvar 2 í gær kannski hefði mátt standa betur að málinu.

„Þarna var auðvitað seðlabankinn að túlka hvað hann ætti að gera og ég held að hann hefði alveg mátt fara aðra leið, en einhverjir hefðu þá kannski sagt að þá væri hann að brjóta einhverjar jafnræðisreglur," sagði Már.

Már sagðist ekki óttast hugsanlegt skaðabótamál. „Hvort sem það er skaðabótamál við bankann eða að kæra mig, að þá er það bara þeirra réttur og þá kemur í ljós hvað sé rétt í því," sagði Már.

Gæti hann sjálfur skoðað eigin réttarstöðu vegna málsins.

„Í fjölmiðlum hafa komið fram mjög alvarlegar ásakanir og sumar hverjar sem lögmenn segja vera langt út fyrir alla meiðyrðalöggjöf. Þar sem því er til dæmis bara slegið föstu að ég sé sekur og gæti ekki einu sinni tekið sæti í stjórn Fjármálaeftirlitsins. Þetta er náttúrulega mjög mikil yfirlýsing og kannski skoða ég það eitthvað," sagði Már.