Twitter eyddi tíu þúsund reikningum sem hvöttu fólk til að kjósa ekki

Tíu þúsund sjálfvirkum Twitter-reikningum sem sendu út skilaboð þar sem fólk var hvatt til að kjósa ekki í þingkosningum í Bandaríkjum á þriðjudag hefur verið eytt. Tístin voru send út í nafni demókrata. Twitter greip til aðgerða eftir að flokkurinn benti á reikningana sem villtu á sér heimildir.

Kosið verður til Bandaríkjaþings á þriðjudag. Talsmaður Twitter segir Reuters-fréttastofunni að falsreikningunum hafi verið eytt seint í september og í byrjun október. Samfélagsmiðillinn hefur áður eytt milljónum reikninga sem voru taldir dreifa rangindum fyrir forsetakosningarnar árið 2016.

Mikil umræða hefur verið um áróðursherferðir á samfélagsmiðlum í aðdraganda kosninga eftir að rússnesk stjórnvöld beittu þeim til þess að reyna að hafa áhrif á úrslit forsetakosninganna í Bandaríkjunum fyrir tveimur árum.

Leyniþjónustustofnanir Bandaríkjanna hafa varað við því að Rússar reyni að leika sama leik fyrir kosningarnar nú.