Allir sáu rautt á Háaleitisbraut

Umferðarljós á gatnamótum Háleitisbrautar, Ármúla og Safamýri virka ekki sem skyldi þessa stundina. Rautt ljós blasir við öllum bílum og aldrei kemur grænt. Fyrir vikið eru bílar farnir að aka yfir á rauðu úr öllum áttum.

Töluverður umferðarþungi er á umræddum gatnamótum en lögreglu hefur verið gert viðvart.

Uppfært klukkan 12:35

Ljósin sýna nú bæði grænt, rautt og gult á gatnamótunum. Hinrik H. Friðbertsson, hjá umferðarljósadeild Reykjavíkurborgar, segir að villa hafi komið upp í hugbúnaði sem olli því að í eina aksturátt hefðu ljósin verið föst í rauðu.

Brugðist hafi verið strax við eftir að ábending barst um bilun. Var búnaðurinn endurræstur á staðnum og hefur umferð gengið eðlilega síðan.