Telur bæjarstjóra svívirða saklausan mann sem eitt sinn taldist svarinn andstæðingur hans

Íris Róbertsdóttir, bæjarstjóri Vestmannaeyjabæjar, og Elliði Vignisson, fyrrverandi bæjarstjóri Vestmannaeyjabæjar, hafa sent hvort öðru tóninn í aðsendum greinum vegna þess að Herjólfur ofh. keypti lögfræðiþjónustu af fyrirtæki stjórnarmanns félagsins, Lúðvík Bergvinssyni.

Herjólfur ohf. er opinbert félag í eigu Vestmannaeyjabæjar sem var stofnað til að halda utan um rekstur nýrrar ferju sem er enn í smíðum í Póllandi. Búist er við að nýi Herjólfur fari sína ferð til Vestmannaeyja 30. mars næstkomandi.

Stundin fjallaði um kaup Herjólfs ohf. á lögfræðiþjónustu frá Bonafide en meðeigandi félagsins, Sigurvin Ólafsson, hefur unnið lögmannsstörf fyrir rekstrarfélag Herjólfs.

Lúðvík sagði við Stundina að um björgunaraðgerð væri að ræða því verkefnastjóri Herjólfs ofh. hefði hætt í sumar og þurfti að brúa bilið sem skapaðist. Stjórn Herjólfs ofh. hefði tekið þá ákvörðun að leita mætti til Sigurvins ef upp kæmu mál sem þyldu ekki bið.

Íris Róbertsdóttir sagði í samtali við Stundina að Vestmannaeyjabær hefði greitt Bonafide 1.400 þúsund krónur fyrir vinnu lögmannsstofunnar fyrir félagið.

Nýr framkvæmdastjóri tók við félaginu í október en Lúðvík sagði við Stundina að framkvæmdastjórinn myndi taka ákvörðun um við hvaða lögmannsstofu Herjólfur ohf. semur í framhaldinu.

Sagði sig úr stjórn Herjólfs ohf.

Dóra Björk Gunnarsdóttir, fulltrúi H-listans í Vestmannaeyjum, tilkynnti nýverið að hún hefði sagt sig úr stjórn Herjólfs ohf. en í tilkynningu sem birt var á Eyjar.net sagði hún samskipti lítil sem engin innan stjórnar, fundir væru fáir og upplýsingagjöfin léleg til þeirra sem eru í framkvæmdanefndinni.

Meðal þess sem hún nefndi máli sínu til stuðnings eru störf lögmanns Bonafide fyrir Herjólf ofh. og taldi það ekki samræmast almennu siðferði stjórnar að fyrirtæki stjórnarmanna séu að vinna fyrir félagið.

Íris Róbertsdóttir sagði við Stundina að hún hefði benti Lúðvík Bergvinssyni tvisvar á að hún teldi það óeðlilegt að Herjólfur ohf. væri í viðskiptum við lögmannsstofu hans.

Bætti hún við að hún væri með vinnu og vinnulag stjórnar rekstrarfélags nýja Herjólfs til skoðunar vegna afsagnar Dóru Bjarkar.

Fordæmalausar árásir að mati Elliða

Elliði Vignisson, sem í dag er bæjarstjóri sveitarfélagsins Ölfuss, er allt annað er sáttur við svör Írisar í Stundinni. Hann ritaði aðsenda grein sem var birt á vef Eyjafrétta sem ber heitið Það er kúnst að svívirða mann.

Hann vill meina að verið sé að svívirða saklausan mann, og vísar þar til umfjöllunar um viðskipti Herjólfs ofh. við lögmannsstofu Lúðvíks.

„Árásir núverandi stjórnenda Vestmannaeyjabæjar og fylgismanna þeirra á Lúðvík Bergvinsson eru í mínum huga fordæmalausar,“ segir Elliði sem fer mikinn í greininni.

Hann segir þetta vera ljótan leik og að hann væri ekki sá maður sem hann vill vera ef hann stigi ekki fram Lúðvík til varnar. „Jafnvel þótt seint verðum við Lúðvík taldir samherjar í pólitík. Um stund meira að segja svarnir andstæðingar,“ skrifar Elliði sem er í Sjálfstæðisflokknum en Lúðvík sat eitt sinn á þingi fyrir Samfylkinguna. 

Finnst Lúðvík ekki hafa fengið það lof sem hann á skilið

Hann segir það hafa verið gæfu Vestmannaeyjabæjar að leita til Lúðvíks. „Þó ég hafi aldrei trúað því að ég ætti eftir að segja það, miðað við það sem á undan er gengið í okkar samskiptum, þá var innkoma Lúðvíks Bergvinssonar og þekking hans meðal þess sem skipti sköpum að samningar við ríkið tókust.“

Hann segir tilraun gerða til að gera vinnu Lúðvíks og Bonafide í samningaviðræðum við ríkið ótrúverðuga en Elliði segir Lúðvík hafa unnið af heilindum fyrir sínar heimaslóðir, lagt mikið á sig fyrir verkefnið og hvergi hlotið þær þakkir sem hann á skilið.

„Manni sem varið hefur hundruðum klukkustunda í vinnu fyrir samfélagið sitt, lánað aðstöðu og margt fl.“

Finnst endurkoma Elliða sérkennileg

Íris svaraði Elliða í dag  og sagði endurkomu forvera hennar í bæjarmálaumræðuna í Eyjum um síðustu helgi hafa verið nokkuð óvænta og sérkennilega.

Hún segir ummæli sín í Stundinni langt frá því að teljast óeðlileg. Hún hafi tekið almenna og eðlilega varðstöðu gegn hagsmunaárekstrum og sagðist hafa komið þessum sjónarmiðum áður fram við Lúðvík sjálfan og því hefðu þau ekki átt að koma Lúðvík á óvart .

Hún segir hana og oddvita Eyjalistans fullkomlega sammála í þessari afstöðu.

Íris segir ummæli sín ekki hafa verið árásir og þaðan af síður svívirðingar.

„Ég var einfaldlega að benda á hið augljósa og í því fólst ekki einu sinni gagnrýni á stjórnarformanninn – hvað þá árásir eða svívirðingar. Enda situr formaðurinn í umboði og á ábyrgð núverandi meirihluta bæjarstjórnar en ekki fyrrverandi; þótt sumir virðist reyndar eiga erfitt með að átta sig á því,“ segir Íris.

Fyrstu hrópin heyrast úr Ölfusi til Eyja

Hún segist ekki skilja hvað Elliða gangi til með þessari innkomu í bæjarmálaumræðuna í Eyjum.

„En fólk getur allavega núna hætt þeim samkvæmisleik að geta sér til um hvenær fyrstu hrópin muni heyrast úr Ölfusi til Eyja. Það er komin niðurstaða. Í lokin vil ég svo nota tækifærið til að óska forvera mínum alls velfarnaðar í nýju starfi í Ölfusinu,“ segir Íris.

Íris var oddviti H-listans, Fyrir Heimaey, sem bauð fram í sveitarstjórnarkosningunum í Vestmannaeyjum í vor. Listinn myndaði nýjan meirihluta með Eyjalistanum en áður hafði Sjálfstæðisflokkurinn verið með hreinan meirihluta í Eyjum með Elliða Vignisson bæjarstjóra í forystu. Hafði Sjálfstæðisflokkurinn verið í meirihluta undanfarin tólf ár og hafði Elliði verið bæjarstjóri jafn lengi.

Íris var áður í framboði fyrir Sjálfstæðisflokkinn í Vestmannaeyjum. Hún studdi tillögu um prófkjör hjá flokknum sem stóð til en horfið var frá þeirri ákvörðun síðar meir. Í kjölfarið var stofnað klofningsframboðið H-listi, Fyrir Heimaey, sem Íris leiddi og er hún bæjarstjóri í dag.