„Ég óska þess innilega að þeir láti staðar numið hér“

Ingibjörg Dögg Kjartansdóttir, einn ritstjóra Stundarinnar, segir aðstandendur miðilsins fagna þeim áfangasigri sem felist í dómi Landsréttar. Landsréttur staðfesti í dag niðurstöðu Héraðsdóms Reykjavíkur sem sýknaði Stundina og Reykjavík Media af lögbannskröfu Glitnis HoldCo í febrúar. Lögbann var lagt á fréttaflutning miðlanna upp úr gögnum úr Glitni að kröfu eignarhaldsfélagsins á síðasta ári.

„Þetta er ekki aðeins sigur fyrir þessa fjölmiðla sem um ræðir heldur einnig fyrir lýðræðislega umræðu í landinu og tjáningarfrelsið. Landsréttur kemst að sömu niðurstöðu og héraðsdómur að aðferðir sýslumanns við að þagga niður í fjölmiðlum með þessum hætti hafi verið ólögmætar,“ segir Ingibjörg.

Sjá einnig: Stundin lagði Glitni í Landsrétti

Hún segist ekki vita hvort að niðurstöðunum verði áfrýjað til Hæstaréttar. Það hafi þó komið henni á óvart á sínum tíma þegar Glitnir áfýjaði málinu til Landsréttar. „Þeir gerðu það hins vegar og við eigum allt eins von á því að þeir áfrýi til Hæstaréttar. Ég óska þess innilega að þeir láti staðar numið hér - þetta er orðið gott.“

Ingibjörg segir að þrátt fyrir niðurstöðu dagsins sé lögbannið áfram í gildi. Því verði ekki formlega aflétt fyrr en að endanleg ákvörðun um áfrýjun liggur fyrir. Verði það hins vegar ekki gert muni Stundin halda áfram að vinna fréttir upp úr gögnum frá Glitni, að sögn Ingibjargar.