Bíllinn og dúkkan úr Adam&Evu-innbrotinu fundin

Lögreglan á höfuðborgarsvæðinu fann bílinn, sem notaður var til að brjótast inn í kynlífshjálpartækjaverslunina Adam og Evu við Kleppsveg í Reykjavík snemma í morgun, í bílastæði við Glæsibæ upp úr klukkan þrjú í dag.

Innbrotsþjófarnir tveir bökkuðu bílnum ítrekað á inngang verslunarinnar, fóru inn og stálu þar kynlífsdúkku úr versluninni auk annars varning og óku á brott. Átti þetta sér stað um klukkan hálf sex í morgun.

Jóhann Karl Þórisson, yfirlögregluþjónn á höfuðborgarsvæðinu, segir í samtali við Vísi að kynlífsdúkkan hefði verið í bílnum þegar hann fannst við Glæsibæ fyrr í dag.

Hann segir innbrotsþjófana ófundna og ekki sé vitað hvort um sé að ræða tvær konur eða konu og mann. Hann segir lögregluna í raun engu vísari um hverjir voru að verki.

 

Kynferði þjófanna liggur ekki fyrir

Í frétt Vísis í morgun, þar sem sagði af þessu harkalega innbroti, var staðhæft að um tvær stúlkur væri að ræða. Það byggði á því að ekki verður betur séð; þá er einstaklingur sem augljóslega virðist vera stúlka, kom í ofboði út úr búðinni og dröslaði með sér silikon-dúkkunni, henti henni í götuna meðan hún reyndi að opna stórskemmdan bílinn til að koma dúkkunni þar inn.

Þegar betur er rýnt í myndbandið, sem hefur vakið gríðarlega athygli, gæti hinn aðilinn hæglega verið drengur en sá eða sú hylur andlit sitt íklædd hettupeysu. Eru vangaveltur uppi um þetta víða á internetinu, meðal annars í athugasemdakerfi undir frumfrétt af málinu. En, sem fyrr sagði er ekki vitað hverjir voru að verki.

Bíllinn, sem er af gerðinni Hyundai i10, var á stolnum númerum að sögn Jóhanns.

Hann segir lögreglu eiga eftir að kanna hvort eftirlitsmyndavélar séu á svæðinu þar sem bíllinn var skilinn eftir við Glæsibæ og hvort þjófarnir séu á því myndefni.

Samkvæmt upplýsingum frá eiganda verslunarinnar er það sem ræningjarnir höfðu á brott með sér sílikon-kynlífsdúkka sem kostar 350 þúsund krónur, nokkrir titrarar og sleipiefni.

Jóhann Karl gat aðeins staðfest að svo stöddu að kynlífsdúkkan væri fundin, en óvíst sé um annað þýfi.