Sigurður áfram í farbanni

Sigurður Kristinsson hefur verið úrskurðaður í áframhaldandi farbann til 4. október næstkomandi. Landsréttur staðfesti í gær úrskurð Héraðsdóms Reykjavíkur þess efnis.

Er hann grunaður um aðild að Skáksambandsmálinu svokallaða en lögregla telur að hann hafi skipulagt innflutning á rúmlega fimm kílóum af amfetamíni til landsins í janúar.

Sigurði var sleppt úr gæsluvarðhaldi vegna málsins í apríl en hefur hann verið í farbanni frá því að honum var sleppt úr haldi.

Í úrskurði Landsréttar segir að mati héraðssaksíoknara sé fyrir hendi rökstuddur grunur að Sigurður hafi framið brot sem varðað geti tólf ára fangelsi. Nauðsynlegt sé að tryggja nærveru hans á meðan sakamál á hendur honum sé til meðferðar dómstóla.