Segir þau hafa gert mikil mistök með því að ná Katrínu Tönju heilli á heimsleikana

Eftir að hafa unnið heimsleikana í Crossfit í tvígang, árið 2015 og 2016, komst Katrín Tanja Davíðsdóttir ekki á pall í fyrra. Hafnaði hún í fimmta sæti en þjálfarinn hennar segir þau hafa gert mistök í undirbúningi fyrir leikana sem hann segist bera fulla ábyrgð á.

Fjallað er um árangur Katrínar Tönju í þættinum Road to the Games sem var frumsýndur á YouTube í síðustu viku. Þar sagði þjálfarinn að Katrín Tanja hefði verið meidd þegar hún vann leikana í tvígang. Hann velti því fyrir sér hvað myndi gerast ef þau myndu ná Katrínu Tönju meiðslalausri á leikana, hversu góð yrði hún?

Svarið var ekki nógu góð, að þeirra mati, því þau drógu úr æfingarálaginu til að forðast meiðsli. Niðurstaðan var sú að fjórar konur tóku fram úr henni á leikunum í fyrra.

Toppuðu ekki á réttum tíma

Ben Bergeron, þjálfari Katrínar, segir keppnina í fyrra ekki hafa snúist um framlag. Katrín barðist mjög hart í hverri grein. Vandamálið virðist hafa verið að hún toppaði ekki á réttum tíma.

„Við undirbjuggum okkur á réttan hátt en náðum ekki því mesta út úr henni og við vonuðumst til. Þú getur sigraðað og þú getur lært, og þú lærir langmest af mistökunum sem þú gerir,“ segir Bergeron í þættinum.

„Við tölum mikið um að gefa allt sem við eigum. Ef þú gefur allt sem þú átt þá verður þú ánægð með niðurstöðuna, Eftir að síðustu greininni var lokið og ég vann ekki leikana, þá var ég ekki ánægð, það var ekki það sem ég vildi,“ segir Katrín Tanja í þættinum.

Mistök að passa upp á hana

Bergeron segir árangurinn hafa verið undir væntingum og hann beri fulla ábyrgð á því. „Katrín gerir það sem ég segi henni að gera. Ég var mjög varkár þegar kom að undirbúningi hennar í fyrra. Ég hugsaði þetta rangt. Okkar nálgun var að hún hefur unnið leikana tvisvar og er í mjög góðu formi, hún er ótrúlega sterk andlega og mikil keppnismanneskja,“ segir Bergeron.

Hann greinir hins vegar frá því að Katrín hefði verið meidd á leikunum sem hún vann. „Og ég hugsaði með mér: Hvað ef við náum henni ómeiddri á leikana? Hversu góð verður hún? Við gerðum það og það voru mistök, við fórum frá þeim mörkum sem þessir íþróttamenn þurfa að vera á við æfingar, og þegar við gerðum það, fóru aðrar konur fram úr Katrínu,“ segir Bergeron.

Alltaf aum og elskar það

Nálgunin í ár var því að æfa eins stíft og Katrín mögulega þolir, á hverjum degi.

„Mér líður aldrei vel. Á hverjum degi er eitthvað aumt og ég æfi meira á hverjum degi en ég tel mig vera færa um. Ég elska þá tilfinningu og allt árið hefur verið þannig,“ segir Katrín í þættinum.

Hún segir þetta æfingarálag hafa gert það að verkum að hún hafi sjaldan verið jafn vel undirbúin og í undankeppni leikanna.

Heimsleikarnir hefjast á morgun en þar verður Katrín í sviðsljósinu ásamt Ástralanum Tiu-Clair Toomey sem vann leikana í fyrra. Ásamt Katrínu keppa Annie Mist Þórisdóttir, Ragnheiður Sara Sigmundsdóttir og Oddrún Eik Gylfadóttir. Björgvin Karl Guðmundsson er einnig meðal keppenda ásamt Frederick Ægidius, kærasta Annie Mistar.