Tryggvi sendur á lán í vetur

Landsliðsmaðurinn Tryggvi Snær Hlinason mun ekki leika með Valencia á komandi tímabili. Félagið mun lána hann til liðs í efstu deild á Spáni þar sem hann fær meiri spiltíma.

Spænska fréttasíðan Superdeporte greindi frá þessu. Þar segir að líklegasti áfangastaður Tryggva verði Monbus Obradoiro eða MoraBanc Andorra. Valencia er stórlið í evrópska körfuboltanum og eru fimm sterkir leikmenn innan liðsins sem geta leyst stöðu miðherja og því yrðu mínútur Tryggva mjög takmarkaðar á komandi tímabili.

„Ég vil sjá hann fá fleiri mínútur og halda áfram að þróast. Eins og er hefur hann aðeins náð að sýna sig með landsliðinu, og hefur gert það mjög vel,“ sagði umboðsmaður Tryggva, Quique Villalobos, í samtali við spænska miðilinn.

Tryggvi var ekki valinn í nýliðavali NBA fyrr í sumar. Hann var hins vegar í leikmannahópi Toronto Raptors í sumardeildinni fyrr í mánuðinum en spilaði aðeins fjórar mínútur.