Ökumenn sýni aðgát á Austurlandi

Áfram er gul viðvörun í gildi á suðausturhorni landsins. Þar má búast við hviðóttum vindi í dag, að jafnaði 13 til 20 m/s, en í Mýrdal og í Öræfum má búast við hviðum yfir 30 m/s fram yfir hádegi. Því ættu ökumenn á stórum bifreiðum, eða þeim sem taka á sig mikinn vind, að sýna sérstaka aðgát.

Í öðrum landshlutum, og á Suðausturlandi í kvöld, verður vindur hægari, yfirleitt 8-13 m/s.

Veðurfræðingur segir að nú sé um 992 mb lægð er núna um 500 km suður af Hornafirði og er hún á leið norður en hitaskil frá henni muni ganga upp á landið nú með morgninum.

Það muni því rigna, fyrst við Suðausturströndina þegar að skilin koma upp að landinu á leið sinni norðvestur en á Vestfjörðum hangir líklega þurrt fram á nótt.

Því verður dálítli rigning um tíma í öllum landshlutum, en suðaustantil og á Austfjörðum má búast við talsverðri úrkomu, jafnvel mikilli um tíma síðdegis, en það dregur úr henni í kvöld og snemma í nótt verður yfirleitt þurrt þar.

Hitinn verður víða 9 til 16 stig að deginum en hlýnar heldur á morgun.

Veðurhorfur á landinu næstu daga

Á föstudag:

Hæg austlæg eða breytileg átt og skýjað með köflum en dálítil rigning á Austfjörðum og Suðausturlandi. Hiti 9 til 19 stig, svalast á Vestfjörðum.

Á laugardag:

Austlæg átt, 5-13 m/s og fer að rigna, fyrst austantil. Styttir upp norðanlands um kvöldið. Hiti 11 til 18 stig, hlýjast á Norðurlandi.

Á sunnudag:

Austan 5-13 m/s og rigning eða súld með köflum. Hiti 10 til 18 stig, hlýjast á Vesturlandi.

Á mánudag:

Austan og suðaustan 8-13 m/s og rigning, en úrkomulítið um vestanvert landið. Hiti 12 til 18 stig að deignum.

Á þriðjudag og miðvikudag:

Útlit fyrir suðaustanátt og rigninu suðaustanlands en lengst af þurrt í öðrum landshlutum. Hiti 11 til 17 stig.