ÍA á toppinn eftir að HK missteig sig í Breiðholtinu

Jöfnunarmark í uppbótartíma tryggði HK stig gegn ÍR í Inkasso deild karla. ÍA endurheimti toppsætið með sigri á Selfyssingum. Njarðvík og Víkingur Ólafsvík skildu jöfn suður með sjó.

HK hafði enn ekki tapað leik í deildinni og fyrirfram hefðu nær allir giskað á öruggan sigur gegn liði ÍR sem situr í fallsæti.

Sú varð hins vegar ekki raunin. Markalaust var í fyrri hálfleik en snemma í þeim seinni skoraði Már Viðarsson glæsimark eftir mistök í vörn HK. Gestirnir úr Kópavogi fengu upplagt tækifæri til þess að jafna á 62. mínútu en Helgi Freyr Þorsteinsson varði víti frá Bjarna Gunnarssyni.

Allt leit út fyrir að ÍR væri að sigla gríðarstórum sigri en seint í uppbótartíma skoruðu gestirnir jöfnunarmarkið upp úr klafsi í teignum eftir röð hornspyrna.

Úrslitin í Breiðholtinu þýddu að ÍA fór aftur á topp deildarinnar með sigri á Selfyssingum á Akranesi. Arnór Snær Guðmundsson skoraði bæði mörk Skagamanna undir lok fyrri hálfleiks.

Það fyrsta kom á 38. mínútu upp úr aukaspyrnu Alberts Hafsteinssonar. Hann bætti svo við eftir klafs í teignum upp úr hornspyrnu.

Víkingur Ólafsvík fór upp í þriðja sætið, upp fyrir Þór á markatölu, með jafntefli í Njarðvík.

Kwame Wuee kom Víkingum yfir eftir frábæra sendingu Sasha Litwin inn fyrir vörn Njarðvíkinga. Heimamenn voru þó fljótir að svara, nýttu sér háa stöðu Víkinga á vellinum, Luka Jagacic átti stungusendingu inn á Kenneth Hogg sem komst inn fyrir vörn Víkings og skoraði.

Fleiri urðu mörkin ekki og liðin deildu með sér stigunum.

Upplýsingar um úrslit og markaskorara eru fengnar frá Fótbolta.net.