Hæsta þorskveiðiráðgjöf frá því aflamarkskerfi var tekið upp

Ráðlagður heildarafli á þorski á næsta fiskveiðiári er einn sá mesti sem Hafrannsóknarstofnun hefur lagt til frá því aflamarkskerfið var tekið upp. Þrátt fyrir það eru ekki horfur á að þorskstofninn vaxi mjög hratt á næstu árum að mati sérfræðinga stofnunarinnar. Mestu munar hins vegar um mikla aflaaukningu á ýsu en stofn hennar hefur vaxið hratt eftir að hafa dregist mikið saman á árum áður.

Þótt ferðaþjónustan skipti þjóðarbúið miklu máli og hafi vaxið umfram aðrar greinar á undanförnum árum hvað gjaldeyristekjur varðar skiptir sjávarútvegurinn enn mjög miklu máli fyrir efnahag þjóðarinnar. Hafrannsóknarstofnun kynnti í dag ráðgjöf sína um veiðar á næsta fiskveiðiári sem hefst hinn 1. september.

Það eru bæði góðar og slæmar fréttir í veiðiráðgjöf Hafrannsóknarstofnunar fyrir næsta fiskveiðiár. Góðu fréttirnar eru þær að lögð er til mikil aukning á veiðum á dýrmætustu fiskveiðitegundunum; þorski, ýsu og ufsa og þá alveg sérstaklega á ýsunni.

Það felast mikil verðmæti í tæplega sjö þúsund tonna viðbót í þorski, tæplega 36 þúsund tonna aukningu í ýsu og tæplega 19 þúsund tonna aukningu í ufsa. En undanfarin ár hefur ýsustofnin barist í bökkum. Guðmundur Þórðarson sviðsstjóri botnsjávarsviðs Hafrannsóknarstofnunar segir ánægjulegt að hægt sé að auka aflaheimildir á helstu nytjastofnum.

„Nú eru að koma inn þrír árgangar sem eru nokkuð sæmilegir. En einnig hefur vöxtur ýsu aukist mjög mikið. Þannig að meðalþyngd eftir aldri hefur aukist. Sem leiðir til þessarar niðurstöðu að því er spáð að stofninn vaxi hratt núna þegar þessir árgangar koma inn,” segir Guðmundur.

Þorskurinn er einning heldur að braggast en Íslendingar eru þó enn langt frá því að veiða eins mikinn þorsk á íslandsmiðum og gert var upp úr 1950 þegar yfir hálf milljón tonna voru veidd, enda var stofninn ofveiddur og veiðar síðar dregnar stórlega saman. Nú er talið óhætt að veiða rúm 264 þúsund tonn án þess að koma í veg fyrir að stofninn vaxi.

Hvað er það í í sögulegu samhengi þorskveiða á Íslandi?

„Þetta er ein hæsta ráðgjöf frá því aflaregla var tekin upp. En ef litið er til tímabilnsins fyrir 1994 til 1995 er þetta ekki hátt í því samhengi,” segir Guðmundur. Og ekki er víst að þetta sé ávísun á hraða aukningu í þorskveiðum á næstu árum.

„Miðað við það sem við vitum núna er kannski ekki hægt að sjá einhverjar stórkostlegar breytingar. Það sem okkur vantar er aukin nýliðun. Stærri árganga. Því sú nýliðun sem við sjáum núna og okkur finnst nokkuð góð miðað við það sem hefur verið frá kannski aldamótum, er bara meðalnýliðun miðað við það sem var á tímabilinu frá 1955 til 1980,” segir Guðmundur Þórðarson.