Buðu kennurum eingreiðslu gegn „friðarskyldu“ fram yfir kosningar

Samband íslenskra sveitarfélaga bauð grunnskólakennurum 124.000 króna eingreiðslu gegn því að þeir gripu ekki til neinna aðgerða fyrr en eftir 30. júní, um mánuði eftir yfirvofandi sveitarstjórnarkosningar. Formaður samninganefndar sambandsins segir tilboðið ekki tengt kosningunum. Því hafi verið ætlað að bæta mánaðalangt samningsleysi kennara og gefa nýrri samninganefnd þeirra tíma til að taka við.

Tilboðið var lagt fram 9. apríl og var grunnskólakennurum greint frá því í tölvupósti fyrir viku. Í því fólst að ný viðræðuáætlun yrði gerð til 30. júní. Kennarar fengju eingreiðslu upp á 124.000 krónur sem yrði greidd 1. maí en á móti gengist félagið undir svonefnda friðarskyldu á gildistíma viðræðuáætlunarinnar, það er að segja að grípa ekki til neinna aðgerða til að knýja á um kröfur kennara á gildistímanum.

Ný samninganefnd Félags grunnskólakennara á að taka við á aðalfundi félagsins 18. maí. Starfandi samninganefnd bar tilboðið undir þá nýju sem ákvað að hafna því.

Kennarar hafa verið án samnings frá 1. desember. Þeir felldu samning í lok mars og nú standa yfir valdaskipti í félaginu. Auk samninganefndarinnar tekur ný stjórn formlega við á aðalfundinum í næsta mánuði.

Telur tímasetninguna ekki tilviljun

Þorgerður Laufey Diðriksdóttir, verðandi formaður Félags grunnskólakennara og formaður nýrrar samninganefndar, segir að tilboð sveitarfélaganna hafi verið ígildi þeirrar 3% launahækkunar sem kennarar felldu í síðasta mánuði. Því hafi nýja samninganefndin ekki talið sig hafa umboð til að samþykkja tilboðið nú.

Þá telur hún tímasetningu tilboðsins ekki tilviljun í ljósi sveitarstjórnarkosninga sem fara fram 26. maí. Sérkennilegt hafi verið að kveða á um friðarskyldu í því.

„Þá er hægt að líta svo á að þetta samkomulag sem lá þarna á borðinu og var hafnað hafi verið ígildi framlengingar þessa samnings sem nú er í gildi,“ segir Þorgerður Laufey.

Samkvæmt heimildum Vísis hafa sumir úr stétt grunnskólakennara litið á tilboð sveitarfélaganna sem tilraun þeirra til að kaupa sér frið fram yfir sveitarstjórnarkosningarnar. Inga Rún Ólafsdóttir, formaður samninganefndar Sambands íslenskra sveitarfélaga, hafnar því hins vegar.

Tímasetningu valdaskiptanna í Félagi grunnskólakennara í miðjum kjaraviðræðum segir hún óþægilega fyrir bæði kennara og sveitarfélögin og að hún setji þær að vissu leyti í uppnám.

„Þetta var gert til að brúa þetta bil. Bæði að bæta þetta samningslausa tímabil og líka að bíða eftir nýju fólki,“ segir hún. Markmið SÍS hafi fyrst og fremst verið að tryggja framgang viðræðna við kennara.

Ekki skynsamlegur tími fyrir aðgerðir hvort sem er

Ólafur Loftsson, fráfarandi formaður Félags grunnskólakennara, segist ekki hafa upplifað tilboð sveitarfélaganna sem einhvers konar griðkaup. Samninganefnd sveitarfélaganna hafi frekar verið að gefa nýrri samninganefnd kennara tækifæri til þess að koma strax að viðræðum og svigrúm til að setja sig inn í þær.

„Enda má öllum vera ljóst að það sé ekki skynsamlegur tími fyrir kennara að fara í harðar aðgerðir að vori eða sumri. Að því leytinu til hefði þetta getað verið skynsamleg ráðstöfun,“ segir Ólafur.

Ný samninganefnd grunnskólakennara ætlar að funda með samninganefnd sveitarfélaganna á fimmtudag. Þorgerður Laufey segir að þá verði vonandi sett upp tímasett viðræðuáætlun sem ætti að leiða til nýs kjarasamnings sem verði svo borinn undir félagsmenn.

Samningurinn sem kennarar felldu í mars fól meðal annars í sér launabreytingar, að horfið yrði frá vinnumati, undirbúningur hverrar kennslustundar yrði aukinn, tími til annarra faglegra starfa yrði minnkaður og að greitt yrði fyrir sértæk verkefni. Alls greiddu rúm 68% félagsmanna í Félagi grunnskólakennara atkvæði gegn samningnum.