Upphitun: Þegar að Sigurbjörn og Salih Heimir söltuðu KR-inga fyrir 21 ári | Myndband

Reykjavíkurstórveldin Valur og KR mætast í kvöld í fyrstu umferð Pepsi-deildar karla en óhætt er að segja að flautað verður til leiks á Íslandsmótinu með látum.

Leikurinn verður í beinni útsendingu á Stöð 2 Sport HD en upphitun fyrir leikinn hefst klukkan 19.30. Allir leikir umferðarinnar verða svo gerðir upp í Pepsi-mörkunum á sunnudagskvöldið.

Valur og KR hafa marga hildina háð í gegnum tíðina enda sigursælustu félög Íslandsmótsins; KR með 26 Íslandsmeistaratitla og Valur með 21 eftir sigurinn síðasta haust

Dapurt sumar beggja liða

Undir lok síðasta áratugs síðustu aldar virtist bara tímaspursmál hvenær Valur myndi falla niður um deild og niður fór liðið 1999 sama ár og KR varð meistari eftir langa bið.

Valsmenn voru í fallbaráttunni sumarið 1997 en KR var með lið sem átti að verða meistari. Valsmenn voru í fallbaráttunni en héldu sæti sínu. KR olli gríðarlegum vonbrigðum með stjörnum prýtt lið og hafnaði í fimmta sæti.

Liðin mættust í fjórðu umferðinni sumarið 1997 en bæði lið höfðu farið illa af stað. Valur tapaði fyrir Leiftri, 5-0, í þriðju umferðinni en KR svaraði fyrir slæma byrjun í fyrstu tveimur umferðunum og vann Skallagrím, 4-0, í þriðju umferð.

Gamli Valsvöllurinn var stappaður 29. maí 1997 þegar að KR-ingar komu í heimsókn en fæstir bjuggust við neinu öðru en sigri KR-inga. Annað kom á daginn því Valsliðið vann óvæntan 3-1 sigur.

Glæsileg mörk

Sigurbjörn Hreiðarsson, sem er aðstoðarþjálfari Vals í dag, skoraði fyrsta markið og Salih Heimir Porca bætti við öðru markinu á 32. mínútu. Staðan 2-0 í hálfleik og ekkert gekk hjá KR. Einar Þór Daníelsson og Heimir Guðjónsson nældu sér í gult spjald í fyrri hálfleik.

Markið hjá Salih Heimi í fyrri hálfleik var afskaplega fallegt, beint úr aukaspyrnu. KR-ingar reyndu að setja mann í fjærhornið þannig að Kristján Finnbogason gæti einbeitt sér að markmannshorninu en það dugði ekki til. Sigþór Júlíusson, sem glímdi lengi við ákveðinn sentimetraskort, náði ekki upp í slá þegar að spyrnan kom.

Sigþór var tekinn af velli á 63. mínútu í seinni hálfleik og inn á kom Andri Sigþórsson sem var þá kominn heim eftir dvöl hjá Bayern München. Hann minnkaði muninn á 73. mínútu en sex mínútum síðar innsiglaði Salih Heimir sigur Valsmanna með öðru glæsilegu marki. Lokatölur, 3-1

Báðir reknir

Sigurinn hafði áhrif á stöðu Lúkasar Kostic sem þjálfara KR. Hann gerði markalaust jafntefli við Leiftur í næstu umferð og var svo rekinn. Liðið var aðeins með fimm stig af fimmtán mögulegum eftir fimm leiki. Lúkas, sem mætti ekki í viðtal eftir leikinn heldur sendi aðstoðarmann sinn, Magnús Gylfason, var látinn fara og við tók Haraldur Haraldsson.

Hvorugur þjálfarinn í þessum leik átti eftir að halda starfi sínu því að Sigurður Grétarsson var rekinn eftir jafntefli á móti nýliðum Skallagríms í 11. umferðinni og Þorlákur Árnason ráðinn. Þorlákur hélt liðinu uppi en það fór svo niður tveimur árum síðar.

Allt það helsta úr þessum skemmtilega leik í lýsingu Guðjóns Guðmundssonar má sjá í spilaranum hér að neðan auk viðtala við Sigurð Grétarsson og Magnús Gylfason.