78 milljarða samdráttur lána

1.366 milljóna króna afgangur var á rekstri Íbúðalánasjóðs í fyrra. Eiginfjárhlutfall sjóðsins er nú 8,5 prósent en langtímamarkmið sjóðsins er að hlutfallið sé yfir 5 prósentum. Eigið fé Íbúða­lánasjóðs í lok síðasta árs var 24,9 milljarðar króna en var 23,5 milljarðar árið áður. Heildareignir sjóðsins nema 762 milljörðum og heildarskuldir 737 milljörðum.

Í lok ársins voru útlán sjóðsins 500 milljarðar króna og höfðu dregist saman um 78 milljarða króna frá árinu 2016. Skýrist minnkun lánasafnsins af stórauknum uppgreiðslum, afskriftum og ráðstöfun séreignarsparnaðar inn á lán hjá sjóðnum. Uppgreiðslur frá viðskiptavinum skýrast að stórum hluta af aukinni sókn lífeyrissjóða inn á lánamarkaðinn.