Dæmdur nauðgari ákærður fyrir nauðgun þvert á beiðni brotaþola

37 ára gamall karlmaður hefur verið ákærður fyrir að nauðgun og brot í nánu sambandi með því að hafa á alvarlegan hátt ógnað heilsu og velferð unnustu sinnar. Málið vakti mikla athygli þegar það kom upp fyrir tæpu einu og hálfu ári en unnustan hætti við að kæra málið og lýsti því að menn vopnaðir byssu hefðu komið á heimili hennar og ógnað henni.

RÚV greinir frá því að aðalmeðferð í málinu hafi hafist í gær í Héraðsdómi Reykjaness en því er framhaldið í dag að því er fram kemur á dagskrá dómsins. Þinghald í málinu er lokað.

Maðurinn, hinn 36 ára gamli Stefán Þór Guðgeirsson, neitar sök. Lögregla hefur fulla heimild til að rannsaka og gefa út ákæru í málum, óháð því hvort þau eru kærð eða ekki, ef hún telur tilefni til.

Dró kæruna til baka

Upphaf málsins má rekja til þess að konan leitaði á neyðarmóttöku Landspítalans þann 10. desember 2017 og lýsti ofbeldi mannsins. Voru teknar margvíslegar ljósmyndir af áverkum á hnjám, hálsi og baki auk þess sem lýst var miklum eymslum við endaþarm.

Fram kemur í skýrslu lögreglu að hún hafi lýst atburðum á greinargóðan hátt í tímaröð og því ofbeldi sem hún var beitt. Voru lýsingarnar á ofbeldinu mjög grófar. Þá sagðist hún vera hrædd við manninn. Var Inga Lillý Brynjólfsdóttir skipuð réttargæslumaður konunnar.

Fjórum dögum síðar, þann 14. desember barst lögreglu umboð til Sveins Andra Sveinssonar þess efnis að hann væri tilnefndur réttargæslumaður hennar. Með umboðinu fylgdi yfirlýsing frá konunni þar sem hún frásögn hennar var gjörbreytt. Nú segði hún kynlífið hafa verið með hennar samþykki og hún hefði stundað gróft kynlíf.

Var heimild lögreglu til að kalla eftir læknisvottorði frá Landspítalanum afturkölluð. Upplýsingar um breytingar á framburði brotaþola birtust í greinargerð lögreglu í dómi Hæstaréttar. Undraðist Sveinn Andri að nafns hans væri dregið inn í umræðuna af lögreglu. Hann gæti ekki annað en trúað orðum skólstæðings síns.

Nýttu heimild til hlerunar

Þrátt fyrir að konan hefði dregið kæru sína til baka hóf lögregla rannsókn á málinu eins og hún hefur heimild til.

„Við rannsökum málin í samræmi við þau gögn sem liggja fyrir hverju sinni. Ef við höfum gögn til að styðjast við þá förum við eins langt og við getum í öllum málum. Rannsókn í þessu máli miðar vel. Við erum að rannsaka mjög alvarlegt brot og gerum það sem við getum til að upplýsa hvað átti sér þarna stað í samræmi við þau gögn sem við höfum,“ sagði Árni Þór Sigmundsson, yfirmaður kynferðisbrotadeildar lögreglunnar.

Rannsókn gekk hægt þar sem konan vildi ekki aðstoða lögreglu. Sagðist hún upplifa sig sem glæpamann vegna þess að lögregla beiti hlerunarbúnaði auk þess að leggja hald á tölvu í eigu sonar hennar og síma á heimilinu.

„Það er alltaf hægt að teygja það í allar áttir hvort [aðgerðirnar] eru miklar eða ekki. Við erum að rannsaka mjög alvarlegt brot sem við lítum alvarlegum augum og notum þau úrræði sem við þurfum til þess að upplýsa þannig mál,“ sagði Árni Þór.

Óttaðist „skósveina“ mannsins

Hlerunaraðgerðir stóðu yfir í um mánuð. Svo var konan og fleiri vitni yfirheyrð samtímis í janúar til að lágmarka möguleikann á samræmingu vitnisburðar.

Að rannsókn lokinni var málið sent embætti héraðssaksóknara sem ákvað að ákæra í málinu. Var ákæra gefin út í lok nóvember síðastliðnum. Það þýðir að saksóknari telji málið líklegra en ella að það leiði til sakfellingar.

Stefán Þór neitar sök í málinu og sagði í skýrslutöku lögreglu að um gagnkvæman vilja hefði verið að ræða. Fyrst sagði hann þau hafa kysst og kelað en eftir að hafa heyrt af framburði konunnar breytti hann framburði sínum og sagði þau hafa stundað endaþarmsmök með samþykki beggja.

Systir konunnar viðurkenndi fyrir lögreglu þann 16. desember að hún óttaðist manninn og „skósveina hans.



Stefán Þór var í viðtali hjá fréttastofu Stöðvar 2 árið 2013 þar sem neysla á Litla-Hrauni var til umfjöllunar.

Með fimm ára dóm á bakinu

Stefán Þór hlaut fimm ára dóm árið 2012 fyrir að hafa nauðgað konu sem hann ætlaði að kaupa vændi af. Var um þyngingu að ræða en héraðsdómur hafði áður dæmt Stefán Þór í fjögurra ára fangelsi.

Samkvæmt lýsingu á atburðum kom Stefán Þór í íbúð konunnar og bað hana um kynlífsgreiða. Hún neitaði og kvaðst vera þreytt. Hann mun þá hafa nauðgað henni. Í dómi Hæstaréttar var hann bæði fundinn sekur um að hafa reynt að kaupa vændisþjónustu en líka að hafa þröngvað konunni með líkamlegu ofbeldi til samræðis og annarra kynferðismaka, slegið hana í læri, sprautað úr slökkvitæki yfir hana og hótað henni að svipta hana vegabréfi hennar.

Stefán Þór fékk reynslulausn í ágúst 2016 þegar tæp tvö ár voru eftir af dómi hans. Hann var dæmdur til að ljúka afplánun sinni þegar málið sem nú er rekið fyrir dómstólum kom á borð lögreglu.

Árið 2007 var Stefán Þór dæmdur í 21 mánaða skilorðsbundið fangelsi í héraðsdómi í Nordhom í Þýskalandi.