SA leggst gegn fækkun dagvinnustunda og segir byrjað á öfugum enda

Í dag verður mælt fyrir frumvarpi þingmanna Pírata um að vinnuvikan verði stytt í 35 stundir eða um klukkustund á dag. Í greinargerð segir að í nokkrum öðrum Evrópulöndum hafi vinnuvikan verið stytt og þar sé framleiðni engu að síður meiri en hjá íslenskum fyrirtækjum.

Björn Leví Gunnarsson er fyrsti flutningsmaður frumvarpsins en aðrir þingmenn Pírata eru meðflutningsmenn. Frumvarpið hefur í tvígang verið lagt fram áður á þingi en ekki náð fram að ganga.

Samkvæmt frumvarpinu yrði dagvinnustundum fækkað úr átta í sjö þannig að vinnuvikan í dagvinnu yrði 35 stundir í stað fjörutíu. Í greinargerð kemur fram að í tölum OECD sé Ísland í 25. sæti með 1.883 vinnustundir á móti 1.363 vinnustundum í Þýskalandi þar sem vinnutíminn mælist stystur og 1.410 í Danmörku sem er með næststystan vinnutíma.

Segir ekki rétt að vinnustundir séu mun fleiri á Íslandi

Félag atvinnurekenda, Viðskiptaráð og Samtök atvinnulífsins hafa mælt gegn lagasetningunni í fyrri umsögnum sínum þegar sams konar frumvörp hafa verið lögð fram. Halldór Benjamín Þorbergsson framkvæmdastjóri Samtaka atvinnulífsins segir að með frumvarpinu sé verið að byrja á öfugum enda hvað vinnutíma varði.

„Við höfum kannski fyrst og fremst talað fyrir því að það sé nærtækara að byrja á hinum endanum. Það er að segja draga úr yfirvinnu áður en við förum að stytta dagvinnuna. Það er nú þannig að ef við berum okkur saman við önnur lönd þá eru yfirvinnugreiðslur og yfirvinna mjög stór hluti af íslenskum vinnumarkaði. Rétt um 15 prósent af heildarlaunagreiðslum. En til samanburðar er þetta um 1% á Norðurlöndum og og enn minna víða í Evrópu,“ segir Halldór Benjamín.

Það sé ekki rétt að vinnustundir á Íslandi séu mun fleiri en í flestum samanburðarríkjum á Norðurlöndum og í Evrópu.

„Virkar vinnustundir á Íslandi eru samkvæmt flestum kjarasamningum þrjátíu og sjö stundir. Í sumum kjarasamningum rétt um 36 stundir á viku en ekki 40 stundir. Ef þú tekur dagvinnustundir í Evrópu er Ísland sem næst stystu vinnuvikuna. Aðeins Frakkar eru með styttri vinnuviku,“ segir framkvæmdastjóri SA.

En í þessum tölum Halldórs er tekið tillit til matar- og kaffihlés. Í Frakklandi er vinnuvikan hins vegar 35 stundir.

Í greinargerð með frumvarpinu eru færðar líkur að því að með styttri vinnuviku megi auka framleiðni fyrirtækja sem er með lægsta móti á Íslandi miðað við önnur þróuð ríki. Halldór Benjamín segir framleiðni aukast hægum skrefum yfir langan tíma þegar tugþúsundir manna finni betri leiðir til að sinna starfi sínu vegna aukinnar reynslu og tækniframfara.

„Ef lífið væri svo einfalt að við gætum aukið framleiðni með því einu að stytta alltaf vinnutímann þá væri það eitthvað sem við myndum gera í sífellu. Þar til við myndum öll hætta að vinna og samkvæmt þessari kenning yrði framleiðnin þá óendanleg. Þannig er það að sjálfsögðu ekki,” segir Halldór Benjamín Þorbergsson.