Eldsupptök enn ókunn

Rannsókn á eldsupptökum við húsnæði skipaþjónustu Hraðfrystihússins Gunnvarar á Ísafirði er enn í fullum gangi. Lögreglan hefur nú lokið vettvangsrannsókn en rannsókn á eldsupptökum heldur áfram. Í tilkynningu frá Lögreglunni á Vestfjörðum segir að verið sé að vinna úr því sem kom fram við vettvangsskoðunina.

Rannsókn lögreglunnar á orsökum brunans hófst í morgun. Henni til aðstoðar voru kallaðir til tveir starfsmenn tæknideildar Lögreglunnar á höfuðborgarsvæðinu. Lögreglan segir að ekki sé tímabært að veita frekari upplýsingar.

Slökkviliðsmenn slökktu í síðustu glæðunum um níu leytið í morgun.

Allt tiltækt lið slökkviliðsins á Ísafirði var kallað út rétt eftir klukkan ellefu í gærkvöldi vegna eldsvoða á Ísafjarðarhöfn. Húsnæðið var mannlaust þegar eldurinn kom upp og engin hætta steðjaði að fólki.